काठमाडौँ । अमेरिका र इरानबीच जारी युद्धविराम अन्त्यतर्फ पुगेसँगै दुवै पक्षले युद्धका लागि तयार रहेको चेतावनी दिएका छन्। वार्ताको भविष्य अनिश्चित बनेको छ भने कूटनीतिक प्रयासहरू पुनः पाकिस्तानमा केन्द्रित हुने संकेत देखिएको छ। तर तेहरानले सहभागिताबारे स्पष्ट धारणा नदिँदा स्थिति थप जटिल बनेको छ।
ह्वाइट हाउसका अनुसार उपराष्ट्रपति जेडी भान्स इस्लामाबाद पुगेर दोस्रो चरणको वार्ता अघि बढाउने तयारीमा छन्। तर इरानले अमेरिकी कदमप्रति असन्तुष्टि जनाउँदै वार्तामा सहभागी हुने विषयमा मौनता कायम राखेको छ। तेहरानले अमेरिका विरुद्ध नाकाबन्दी लगाएको र जहाज नियन्त्रणमा लिएको आरोप लगाउँदै युद्धविराम उल्लङ्घन भएको दाबी गरेको छ।
इरानी संसद् अध्यक्ष मोहम्मद बाघेर घालीबाफले दबाबका बीच वार्ता स्वीकार्य नहुने बताएका छन्। उनले पछिल्ला दिनमा इरानले नयाँ रणनीतिक तयारी गरिरहेको संकेतसमेत गरेका छन्। साथै इरानको रिभोलुसनरी गार्ड्सले होर्मुज जलडमरूमध्यबाट अनुमति बिना जाने जहाजलाई निशाना बनाइने चेतावनी दिएको छ।
अमेरिकी राष्ट्रपति डोनाल्ड ट्रम्पले भने इरानले होर्मुज क्षेत्रमा जहाज अवरोध गरेर युद्धविराम उल्लङ्घन गरेको आरोप लगाएका छन्। उनले समझदारी नभएसम्म दबाब जारी रहने र युद्धविराम सकिए ठूलो स्तरको सैन्य कारबाही हुन सक्ने चेतावनी दिएका छन्।
तनावबीच अन्तर्राष्ट्रिय बजारमा भने तेलको मूल्य घट्दो देखिएको छ। विश्लेषकहरूका अनुसार होर्मुज जलडमरूमध्य पुनः सञ्चालन हुने आशाले बजारमा केही राहत देखिएको हो।
यसैबीच, इरानमा युद्धविरामपछि सामान्य जीवन फर्किएको संकेत देखिए पनि आर्थिक अनिश्चितता कायम रहेको स्थानीयहरूले बताएका छन्।
उता, इजरायल र लेबनानबीच पनि छुट्टै युद्धविराम घोषणा भएको छ। तर दक्षिणी लेबनानमा छिटपुट हिंसा जारी रहेको र संयुक्त राष्ट्र संघले एक फ्रान्सेली शान्तिरक्षकको हत्या घटनाको निन्दा गरेको छ। उक्त द्वन्द्वमा हजारौँको ज्यान गइसकेको तथ्याङ्क सार्वजनिक भएको छ।
अमेरिका–इरान वार्ताको प्रमुख विवादित विषय इरानको समृद्ध युरेनियम भण्डार पनि बनेको छ। ट्रम्पले इरानले उक्त भण्डार हस्तान्तरण गर्न सहमति जनाएको दाबी गरे पनि तेहरानले त्यसलाई पूर्ण रूपमा अस्वीकार गरेको छ।
एजेन्सी
