बुधबार, कार्तिक ११ २०८३
बुधबार, कार्तिक ११ २०८३
आइतबार, चैत्र १ २०८२
काठमाडौँ । चैत महिनाका लागि वाणिज्य बैंकहरूले व्यक्तिगत मुद्दति निक्षेपको औसत अधिकतम ब्याजदर घटाएका छन्। फागुनमा व्यक्तिगत मुद्दति निक्षेपको औसत ब्याजदर ४.५६ प्रतिशत रहेकोमा चैतमा ४.४९ प्रतिशतमा झरेको छ। यसरी औसत ब्याजदर ०.०७ प्रतिशत बिन्दुले घटेको हो।
हाल सञ्चालनमा रहेका २० वाणिज्य बैंकमध्ये ६ बैंकले ब्याजदर घटाएका छन् भने १४ बैंकले फागुन महिनाकै दर कायम राखेका छन्। संस्थागत मुद्दति निक्षेपको अधिकतम औसत ब्याजदर पनि चैतमा ०.०३ प्रतिशत बिन्दुले घटेको छ।
चैत महिनामा सबैभन्दा धेरै ब्याजदर घटाउने बैंक नेपाल बैंक लिमिटेड रहेको छ। यस बैंकले व्यक्तिगत मुद्दति निक्षेपको अधिकतम ब्याजदर ०.६ प्रतिशत बिन्दुले घटाएको छ। त्यस्तै, कृषि विकास बैंक लिमिटेड, स्ट्याण्डर्ड चार्टर्ड बैंक नेपाल, कुमारी बैंक लिमिटेड, प्राइम कमर्सियल बैंक लिमिटेड र ग्लोबल आइएमई बैंक लिमिटेड ले पनि चैत महिनाका लागि ब्याजदर घटाएका छन्।
बैंकहरूले तोकेको ब्याजदर यसप्रकार छ:
कृषि विकास बैंक: ४.१५% (फागुन ४.२५%)
स्ट्याण्डर्ड चार्टर्ड बैंक: ४.११% (फागुन ४.२५%)
नेपाल बैंक: ४.५% (फागुन ५.१%)
कुमारी बैंक: ४.१२% (फागुन ४.४३%)
ग्लोबल आइएमई बैंक: ४.२५% (फागुन ४.७५%)
प्राइम कमर्सियल बैंक: ४.१५% (फागुन ४.२५%)
नेपाल एसबिआई बैंक: ४.२५% (फागुन पनि ४.२५%)
एभरेष्ट बैंक, सिद्धार्थ बैंक: ४.२५% (फागुन पनि सोही दर)
माछापुच्छ्रे बैंक, सिटिजन्स बैंक, लक्ष्मी सनराइज बैंक, सानिमा बैंक, नेपाल इन्भेष्टमेण्ट मेगा बैंक: ४.५% (फागुन पनि सोही दर)
प्रभु बैंक, नबिल बैंक: ४.५५% (फागुन पनि सोही दर)
हिमालय बैंक, राष्ट्रिय वाणिज्य बैंक, एनआइसी एशिया बैंक, एनएमबी बैंक: ५% (फागुन पनि सोही दर)
यसरी बैंकहरूले चैत महिनाका लागि व्यक्तिगत मुद्दति निक्षेपको ब्याजदरमा सामान्य घटबढ गरेका छन्।
