एसईईको नतिजा प्रकाशनको अन्तिम चरणमा, बोर्डको बैठक बस्दै

काठमाडौं । माध्यमिक शिक्षा परीक्षा (एसईई)को नतिजा प्रकाशनको प्रक्रिया अन्तिम चरणमा पुगेको छ ।

परीक्षा नियन्त्रक डा. गणेश भट्टराईले नतिजाको काम अन्तिम चरणमा पुगेको बताए । त्यसका लागि आज बोर्ड बैठक बस्ने तयारी गरिएको उनले जानकारी दिए । ‘नतिजाको अन्तिम चरणमा छौँ । तर प्रकाशित गर्ने निर्णय भइसकेको छैन । त्यसका लागि बोर्डको बैठकबाट निर्णय गर्नुपर्छ,’ उनले भने, ‘सम्भवतः बोर्डको बैठक आज बस्छ ।’

उनका अनुसार नतिजा प्रकाशित गर्ने निर्णय भने बोर्डको बैठकबाट मात्र हुने भएकाले त्यसका लागि आज बैठक बस्ने तयारी गरिएको छ। ‘नतिजाको तयारी अन्तिम चरणमा पुगेको छ,’ भट्टराईले भने।

एसईई २०८१ सालको चैत ७ गतेदेखि सञ्चालन गरिएको थियो। नियमित ४ लाख ३१ हजार ४६६ र ग्रेडवृद्धि तर्फ ६७ हजार ७१५ जना गरी कुल ४ लाख ९९ हजार १८३ विद्यार्थी सहभागी भएका थिए।