आइतबार, कार्तिक २२ २०८३
आइतबार, कार्तिक २२ २०८३
मंगलबार, बैशाख ३० २०८२
काठमाडौं । जिल्ला हुलाक कार्यालय, बाराका तत्कालीन कार्यालय प्रमुख जयलालप्रसाद साह कानूसहित ६ जनाविरुद्ध भ्रष्टाचार मुद्दा दायर भएको छ ।
सार्वजनिक सम्पत्ति हानी नोक्सानी गरी भ्रष्टाचार गरेको आरोपमा उनीहरूविरुद्ध अख्तियार दुरुपयोग अनुसन्धान आयोगले मंगलबार विशेष अदालत काठमाडौंमा मुद्दा दायर गरेको हो ।
आयोगका प्रवक्ता राजेन्द्रकुमार पौडेलका अनुसार जिल्ला हुलाक कार्यालय, बाराका नासु हाल कार्यालय प्रमुखसमेत रहेका बलीरामप्रसाद कुर्मीले २०६० सालदेखि नै बचत बैंकको जिम्मा लिँदै आएको तथा बचतकर्ताको बचत रकम कुनै अभिलेख नराखी आफूखुसी अपचलन गरेको भनी जिल्ला प्रशासन र जिल्ला प्रहरी कार्यालयमा उजुरी परेको थियो ।
अनुसन्धानका क्रममा तत्कालीन नासु बलीरामप्रसाद कुर्मीले जिल्ला हुलाक कार्यालय, बारामा बचत बैंक हेर्ने जिम्मेवारी सम्हाल्दा सेवाग्राहीबाट संकलित रकम ५ करोड ३५ लाख ६४ हजार २७९ रुपैयाँ ३३ पैसा हिनामिना गरेको खुलेको आयोगले जनाएको छ ।
बचतकर्ताको निक्षेप रकम पासबुक र लेजर बुकमा मात्र उल्लेख गरी नगदी रजिस्टर र अन्य आधिकारिक अभिलेखमा नचढाइ दुरुपयोग गरेको आयोगको दाबी छ ।
