मंगलबार, कार्तिक २४ २०८३
मंगलबार, कार्तिक २४ २०८३
'आफूले ल्याए वाह वाह !! अरूले त्यहि ल्याए विरोध !'
शुक्रबार, माघ १८ २०८१
काठमाडौं । राष्ट्रिय स्वतन्त्र पार्टी (रास्वपा) का संस्थापक महामन्त्री मुकुल ढकालले सरकारले ल्याएको अध्यादेशलाई लिएर पार्टी नेतृत्वले दोहोरो चरित्र देखाएको आरोप लगाएका छन् ।
सामाजिक सञ्जालमार्फत हिजो त्यहीँ कुरा आफूले गर्दा ठीक हुने तर अहिले सरकारले गर्दा गलत कसरी हुन्छ भनेर उनले प्रश्न समेत गरेका छन् ।
उनले भनेका छन्–’हामी आफैँ सरकारमा हुँदा कैयन अध्यादेशको योजना बुनिरहेका थियौँ । हामी आफैँले ल्याउन खोजेको थुप्रै अध्यादेशमध्ये केही अध्यादेश अहिलेको सरकारले ल्यायो । अब त्यसको विरोध गर्ने रे पार्टीले । त्यहि कुरा हामीले गर्दा राम्रो, अरूले गर्दा नराम्रो ? हामीले गर्दा लोकतान्त्रिक, अरूले गर्दा अलोकतान्त्रिक ?’ ।
उनले एक वर्षअघि देश बनाउने ब्लु प्रिन्ट तयारीका लागी पार्टीका प्रत्येक नेतालाई केही न केही काम केन्द्रीय समितिको बैठकबाटै निर्णय गरेर दिएको भए पनि नतिजा शून्य देखिएको उल्लेख गर्दै काम गर्दा, गर्न खोज्दा पार्टीभित्र घेराबन्दी र तिरस्कार सहनुपरेको गुनासो गरेका छन् ।
‘विरोध मात्र गरेर पार्टी अघि नबढाऔँ, सिर्जनात्मक बनौँ भनेर १ वर्ष अघि पार्टीका जिम्मेवार नेताहरू सबैलाई केहि न केहि काम दिइयो । कसैलाई व्यसाय गर्ने वातावरण सहज बनाउन के के गर्ने , त्यसको सूचि बनाउन । कसैलाई कानुन बनाउने कानुनमा नै खोट छ, अध्यादेशको सहारा लिनु पर्ने बाध्यता छ, कसरी कानुन बनाउने कानुन सुधार्ने, त्यसको सूचि बनाउन । अनेकन जिम्मेवारी प्राय सबैलाई दिइयो ।’ उनले लेखेका छन् ।
‘राजनीतिमा काम त गुट बनाउने रहेछ, हल्लिने, भेट्ने, गफ दिने काम रहेछ । म देश बनाउने, ऐन-कानुन-नियम-नीति के के गर्नपर्छ, त्यसमा घोटिन्थे । आफ्नाले जति गल्ती गरे पनि वाह वाह भन्न पर्ने रहेछ , अरूले जे गरे पनि विरोध गर्न पर्ने रहेछ ।’ उनले भनेका छन्, ‘आफूँले ल्याउने अध्यादेश वाह वाह, अरूले त्यहि ल्याए विरोध गर्न पर्ने रहेछ । देश बनाउने नीति र राजनीति फरक रहेछ । कठै, कसरी बन्छ देश यस्तो तरिकाले ।’
