बुधबार, साउन १३ २०८३
बुधबार, साउन १३ २०८३
महाकाली तर्ने क्रममा भारतीय सुरक्षाकर्मीले तुइन काट्दा महाकालीको उर्लंदो भेलमा खसेर दार्चुलाका जयसिंह धामी बेपत्ता भएको घटनाको सत्यतथ्य बुझ्न घटनास्थल पुगेको छानवीन टोली अहिले दार्चुलामै छ ।
छानवीनको सबै काम काम सकिए पनि गृहमन्त्रालयले काठमाडौँ नफर्कन निर्देशन दिएपछि टोली दार्चुलामै अड्किएको हो । घटनाबारे छानवीन सकेर रिपोर्ट बनाउन भनी काठमाडौँ उड्नै लाग्दा सिंहदरबारबाट तत्काल नआउन आदेश भएपछि उनीहरु एक हप्ता म्याद थपेर थप वयान लिने नाममा उतै अड्किएका हुन् ।
छानवीनको औपचारिक काम सकेर सबै टिपोट गरिसकेको टोलीले भारतीय सीमा सुरक्षा बल (एसएसबी) सँगको समन्वयमा भारततर्फको घटनास्थलको पनि अवलोकन गरेको थियो ।
भौगोलिक कठिनाईका कारण टोलीले नेपालतर्फ भने सेनाको हेलिकोप्टरबाट घटनास्थलको निरीक्षण गरेको थियो । अनुसन्धानका क्रममा पीडित परिवारजनसंग भेटघाट गरेको टोलीले सदरमुकाम खलंगामा पत्रकार,अधिकारकर्मी, राजनीतिक दल र जनप्रतिनिधिहरूसंग छुट्टाछुट्टै भेटघाट तथा छलफल पनि गरेको थियो ।
घटनाका प्रत्यक्षदर्शीसंगको बयानलगायत अनुसन्धानका सबै प्रक्रिया सकेर टोलीले खलंगामा दुई दिन पूरा बितायो । महाकाली नगरपालिकाको पाहुनाकक्षमा दुई दिन बिताएको टोलीको सुरक्षार्थ सशस्त्र प्रहरीले २४ घण्टे कडा डिउटी गरेको थियो ।
घटनाका सबै सरोकारवालाहरूसंग (एसएसबी) संग समेत छलफल,भेटघाट, स्थलगत अवलोकन सबै सकेर समितिले दार्चुलामै प्रतिवेदन लेखनको काम सकेको धेरैको बुझाइ थियो ।
तर, साउन २५ गते दार्चुलाबाट फर्किएको टोलीलाई काठमाडौं नपुग्दै एक साताको म्याद थपिएपछि उतै अड्किनु परेको हो । सम्बध्द स्रोतले बताएअनुसार दार्चुलामै प्रतिवेदन तयार भए पनि दुई देशको सम्बन्धमा खलल पर्ने विषय परेको आशंकामा गृहले उनीहरुलाई तत्काल काठमाडौँ नआउन भनेको हो ।
तत्काल काठमाडौं फर्कंदा सर्वसाधारणलाई समेत चासो हुने भएकाले उक्त घटनाको सत्यतथ्य पत्ता लगाउन प्रहरी,प्रशासन र सरकार भिडिरहेको देखाउन पनि टोलीलाई केही दिन उतै बस्न निर्देशन दिइएको हुनसक्ने सम्बद्ध स्रोतले बताएको छ । स्रोतले भनेको छ,‘रिपोर्ट पेश गर्ने बित्तिक्कै के हो, कसो हो भन्ने चर्चा हुन्छ, त्यसैले केही दिन त्यहिँ भुल्न भनिएको होला । नत्र काम भने सकिइसकेको छ ।’
स्रोत अगाडि भन्छ, ‘महाकालीको भेलमा हराइरहेका धामीलाई ड्रोन क्यामेराले पत्ता लगाउने र छानवीन समितिले घटनाको वास्तविकता बाहिर ल्याउने कुरा उस्तै हुन् । यी दुबै कुरा सरोकारवालाहरुलाई ढाँट्नेसिवाय अरू केही होइन ।’ जनाआश्था साप्ताहिकमा खबर छ l
