बुधबार, कार्तिक ११ २०८३
बुधबार, कार्तिक ११ २०८३
शुक्रबार, असोज २३ २०८३
काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ, महासचिव किरण राई, कोषाध्यक्ष रवीन्द्र जोशी र लेखा अधिकृत सञ्जीव पाण्डेविरुद्ध ठगी तथा खेलमा मिलेमतोसम्बन्धी कसुरमा मुद्दा दायर भएको छ।
केन्द्रीय अनुसन्धान ब्युरो (सीआईबी) को अनुसन्धानका आधारमा बिहीबार ललितपुर जिल्ला अदालतमा मुद्दा दायर गरिएको हो। मुद्दामा प्रतिवादी बनाइएका चार जनामध्ये कोषाध्यक्ष जोशी र लेखा अधिकृत पाण्डे पक्राउ परेका छन् भने अध्यक्ष नेम्वाङ र महासचिव राई फरार रहेको जनाइएको छ।
सीआईबीले अनुसन्धान प्रतिवेदन जिल्ला सरकारी वकिल कार्यालय, ललितपुरमा बुझाउँदै चारै जनाविरुद्ध कानुनी प्रक्रिया अघि बढाउन सिफारिस गरेको थियो।
प्रतिवेदनमा राष्ट्रिय खेलकुद विकास ऐन, २०७७ को परिच्छेद ७ अन्तर्गत दफा ३१ मा उल्लेखित खेलमा मिलेमतो तथा अनियमितता, राष्ट्रहितविरुद्धको कसुर र ठगीसम्बन्धी कसुरमा मुद्दा चलाउन सिफारिस गरिएको छ।
सीआईबीको अनुसन्धान प्रतिवेदनअनुसार एन्फामा ६६ लाख ५३ हजार रुपैयाँ बराबरको अनियमितता भएको उल्लेख छ।
मुद्दा दायर भएसँगै एन्फाका पदाधिकारीमाथि लगाइएका आरोप अब न्यायिक प्रक्रियामा प्रवेश गरेका छन्। आरोपको अन्तिम निरूपण भने अदालतको निर्णयबाट हुनेछ।
