बुधबार, कार्तिक ११ २०८३
बुधबार, कार्तिक ११ २०८३
बिहिबार, असोज १५ २०८३
काठमाडौँ । गृहमन्त्री सुधन गुरुङले रसुवाको भोटेकोशी बाढी प्रभावितको हेलिकप्टरमार्फत उद्धारमा १५ अर्ब रुपैयाँ खर्च भएको भन्ने विवरण गलत भएको बताएका छन् ।
बुधबार सिंहदरबारमा सञ्चारकर्मीसँग कुरा गर्दै गुरुङले हालसम्मको विवरणअनुसार हेलिकप्टर उद्धारमा १४ करोड रुपैयाँभन्दा बढी खर्च भएको बताए । नेपाली सेनाको खर्च विवरण आउन बाँकी रहेकाले कुल खर्च करिब २० करोड रुपैयाँ पुग्न सक्ने उनको भनाइ छ ।
उद्धारमा अर्बौँ रुपैयाँ खर्च भएको भन्ने विवरणमा कुनै सत्यता नरहेको भन्दै उनले खर्चसम्बन्धी बिल सरकारसँग सुरक्षित रहेको बताए ।
‘हेलिकप्टर उद्धारमा १५ अर्ब खर्च भएको कुरा आइरहेको छ । बिलसहित नै १५ अर्ब भनिएको छ । तर वास्तविक खर्च २० करोड रहेछ । १४–१५ करोड खर्च भएको विवरण बिलसहित प्राप्त भएको छ । नेपाली सेनाको विवरण आउन बाँकी छ,’ उनले भने ।
गृहमन्त्री गुरुङले विपद्का बेला सरकारले नागरिकको खोज तथा उद्धारलाई प्राथमिकतामा राखेको बताए । विपद् प्रतिकार्यमा सरकार अझै सक्रिय रहेको उनको भनाइ छ ।
नुवाकोटलगायतका स्थानमा सुत्केरी, गर्भवती महिला र बालबालिकालाई एउटै होल्डिङ सेन्टरमा राख्दा उत्पन्न भएको असहजता तथा कमजोरीलाई सरकारले गम्भीर रूपमा लिएको उनले बताए ।
गुरुङले विपद् प्रतिकार्यका क्रममा सरकारले गरेका कामको समेत गम्भीर समीक्षा गरिने जानकारी दिए ।
