बिहिबार, साउन १४ २०८३
बिहिबार, साउन १४ २०८३
मंगलबार, बैशाख १५ २०८३
वीरगञ्ज (पर्सा)। चालु आर्थिक वर्षको नौ महिनामा वीरगञ्ज नाका हुँदै करिब तीन अर्ब रुपैयाँ बराबरका विद्युतीय सवारीसाधन आयात गरिएको छ ।
वीरगञ्ज भन्सार कार्यालयका अनुसार सो अवधिमा २ अर्ब ९८ करोड रुपैयाँ बराबरका विद्युतीय सवारीसाधन आयात भएका छन्, जुन गत आर्थिक वर्षको सोही अवधिको तुलनामा १०२ प्रतिशत अर्थात् करिब एक अर्ब ५० करोड रुपैयाँले बढी हो ।
भन्सार कार्यालयका सूचना अधिकारी उदयसिंह विष्टका अनुसार विद्युतीय सवारीसाधनको आयात शतप्रतिशतले वृद्धि भएको देखिएको छ । गत आवको नौ महिनामा १ अर्ब ४८ करोड रुपैयाँ बराबरका सवारी आयात भएका थिए ।
चालु आवको नौ महिनामा १ अर्ब ४६ करोड रुपैयाँ बराबरका ४९३ वटा विद्युतीय जिप, कार र भ्यान आयात भएका छन् भने गत आवमा ४८ करोड रुपैयाँका १७२ वटा मात्र आयात भएका थिए ।
त्यसैगरी ९६ करोड रुपैयाँ बराबरका ७ हजार ३९८ वटा विद्युतीय मोटरसाइकल आयात भएका छन्, जुन गत आवमा ५५ करोड रुपैयाँका ४ हजार २२७ वटा मात्र थिए ।
यस्तै ५३ करोड रुपैयाँ बराबरका ४ हजार ६०६ वटा विद्युतीय तीन पाङ्ग्रे सवारीसाधन पनि आयात भएका छन्, जबकि गत आवमा ४५ करोड रुपैयाँका ३ हजार ६१३ वटा मात्र आयात भएका थिए ।
