बिहिबार, कार्तिक १२ २०८३
बिहिबार, कार्तिक १२ २०८३
निजी क्षेत्रद्वारा नगद कारोबार सीमा बढाउन माग
सोमबार, माघ १२ २०८२
काठमाडौं . यही माघ १ गतेदेखि लागू भएको रु पाँच लाखसम्मको नगद कारोबार सीमाले व्यवसायिक गतिविधिमा समस्या सिर्जना गरेको भन्दै निजी क्षेत्रले यस सीमा बढाउन माग गरेको छ।
अन्तर्राष्ट्रिय भन्सार दिवसको अवसरमा आज आयोजित कार्यक्रममा नेपाल उद्योग वाणिज्य महासङ्घ (नेउवाँ महासङ्घ) र नेपाल चेम्बर अफ कमर्शका प्रतिनिधिहरूले रु पाँच लाखभन्दा माथिको कारोबार बैंकिङ प्रणालीमार्फत मात्रै गर्नुपर्ने व्यवस्थामा संशोधन आवश्यक रहेको बताए।
महासङ्घका अध्यक्ष चन्द्रप्रसाद ढकालले बैंकिङ पहुँच देशका सबै स्थानमा पुग्न नसकेको अवस्थामा यस्तो सीमा व्यवसायीहरूको लागि चुनौतीपूर्ण भएको उल्लेख गरे। उनका अनुसार, यो सीमा तोकिनुमा नेपाल सम्पत्ति शुद्धीकरणसम्बन्धी ‘ग्रे लिस्ट’मा रहेकाले अन्तर्राष्ट्रिय दबाबको भूमिका रहेको हुन सक्नेछ।
ढकालले लगानी वातावरण सहज बनाउन र निजी क्षेत्रको प्रवर्द्धन गर्ने नीति आवश्यक रहेको बताए। उनले भन्सार राजस्वलाई मात्र प्राथमिकता दिनुभन्दा मुलुकभित्रका उद्योग–व्यवसाय र उद्यमशीलता प्रवर्द्धन गर्ने नीतिमा सरकार अघि बढ्नुपर्ने जोड दिए। साथै होटल तथा पर्यटन क्षेत्रले अन्य उद्योगसरह राज्यबाट सुविधा नपाएको पनि औँल्याए ।
नेपाल चेम्बर अफ कमर्शका अध्यक्ष कमलेशकुमार अग्रवालले भन्सार प्रशासन राष्ट्रिय अर्थतन्त्र र व्यापार सहजीकरणका लागि अत्यन्त महत्त्वपूर्ण क्षेत्र भएको भन्दै विद्यमान भन्सार ऐनका दण्ड–जरिवानासम्बन्धी व्यवस्था कठोर र अव्यवहारिक रहेको आरोप लगाए। उनले मूल्य अभिवृद्धि कर (भ्याट)मा बहुदर कायम गर्नुपर्ने र वैदेशिक लगानी तथा वैवाहिक कार्यक्रम जस्ता गतिविधिहरूमा भन्सार सहजीकरण आवश्यक रहेको पनि बताए।
कार्यक्रममा भन्सार एजेन्ट महासङ्घका अध्यक्ष प्राचिनकुमार थैवले अवैध व्यापार नियन्त्रण, आर्थिक विकास, राजस्व सङ्कलन र वैदेशिक व्यापार सहजीकरणका लागि पारदर्शी तथा प्रविधिमैत्री भन्सार प्रणाली विकास गर्न जोड दिए ।
