गोरखामा पनि भेटिए कोरोना संक्रमित

गोरखा । पछिल्ला केही दिन यता नेपालका विभिन्न स्थानमा कोरोना संक्रमित व्यक्ति भेटिन थालेका छन् । पछिल्लो समय पश्चिम नेपाल, मधेश प्रदेशको वीरगञ्ज, बागमतीकै चितवनका केही स्थानमा कोरोना संक्रमित फेला परेका थिए ।

यस्तै गोरखामा एक व्यक्तिमा कोरोना सङ्क्रमण पुष्टि भएको छ । गोरखा अस्पतालमा उपचारका लागि आएका एक पुरुषमा कोरोना सङ्क्रमण पुष्टि भएको अस्पतालका सूचना अधिकारी लिपासा श्रेष्ठले जानकारी दिए ।

सहिद लखन गाउँपालिका–७ बुङकोट स्थायी घर भएका ४० वर्षीय पुरुषमा सोमबार सङ्क्रमण पुष्टि भएको उहाँले बताउनुभयो । ती पुरुष ज्वरो र रुघाखोकी समस्या देखिएपछि उपचारका लागि गोरखा अस्पताल आइपुगेका थिए ।

सङ्क्रमितको अवस्था सामान्य रहेको र उनलाई अहिले होम आइसोलेसनमा राखिएको सूचना अधिकारी श्रेष्ठले बताए। सङ्क्रमित व्यक्ति भरतपुरबाट गोरखा आएका थिए ।