आइतबार, कार्तिक २२ २०८३
आइतबार, कार्तिक २२ २०८३
काठमाडौं । नेकपा एमालेको स्थायी कमिटी बैठक आज (आइतबार) बस्ने भएको छ । हिजो च्यासलस्थित तुल्सीलाल स्मृति प्रतिष्ठानको भवनमा बोलाइएको बैठक विषयमा प्रवेश नगरी आज बस्ने गरी स्थगित गरिएको थियो । केही बेर सामान्य छलफलपछि एकताको पहलका लागि भन्दै आज दिउँसो ३ बजे बस्ने गरी बैठक स्थगित गरिएको नेता सुवासचन्द्र नेम्वाङले जानकारी दिए ।
बैठकमा पार्टीको विधान अधिवेशनको तयारी, विभागहरुलाई पूर्णतालगायतका विषयमा छलफल हुने एमाले केन्द्रीय कार्यालयका सचिव शेरबहादुर तामाङले जानकारी दिए। एमालेभित्र जारी विवाद समाधानका लागि भन्दै गठित कार्यदलले तयार पारेको १० बुँदे सहमतिको प्रस्तावबमोजिम विभिन्न आयोगहरु गठन, केन्द्रीय विभागहरुको पूर्णता र प्रदेश कमिटीहरुको अनुमोदनबारे बैठकमा छलफल हुनेछ।
शनिबार बोलाइएको स्थायी कमिटी बैठकमा पनि पार्टीको माधव नेपाल पक्ष सहभागी भएको थिएन। बैठकमा अध्यक्ष केपी ओलीले विघटित कार्यदलका सदस्यहरुसँग सामान्य छलफल गरेर निस्किएका थिए। ओली पक्षले बोलाएको स्थायी कमिटी बैठकमा नजाने नेपाल पक्षले बताएको छ। विवाद समाधान नभएसम्म बैठकमा बोलाउनु र नबोलाउनुको कुनै अर्थ नरहेको नेपाल समूहका स्थायी कमिटी सदस्य बेदुराम भुसालले बताए।
