आइतबार, कार्तिक २२ २०८३
आइतबार, कार्तिक २२ २०८३
काठमाडौँ l नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ सत्ता समीकरण मिलाउने दौडधुपमा छन् ।
उनी निरन्तर शीर्ष नेतासँगको भेटवार्तामा सक्रिय भएर लागेका छन् । आजको प्रचण्डको दैनिकी पनि भेटवार्तामै केन्द्रित छ ।
प्रधानमन्त्री शेरबहादुर देउवा सरकारको नेतृत्व गरेको दुई साता नाघे पनि मन्त्रिपरिषदलाई पूर्णता दिन नसक्दा प्रचण्डको दौडधुप बढेको हो ।
उनले आफ्नो गठबन्धनमा रहेका दलका शीर्ष नेतालाई भेटेर मन्त्रिपरिषद विस्तार र नयाँ मन्त्री चयनमा विषयमा छलफल गरिरहेको प्रचण्डको सचिवालयले जनाएको छ ।
प्रचण्डले नेकपा एमालेको नेपाल समूहलाई सरकारमा सहभागी गराउन आज बिहानै बरिष्ठ नेता माधवकुमार नेपाललाई भेट्न गएका थिए । नेता नेपाल निवास कोटेश्वरमा भएको भेटमा सरकार सञ्चालन तथा नेपाल समूहको सरकारमा सहभागिताका विषयमा छलफल भएको बुझिएको छ । प्रचण्डले नेता नेपाललाई सत्ता सहकार्यका लागि प्रस्ताव गरेको नेपालको सचिवालयले जनाएको छ ।
नेपालसँगको भेट सकिए लगत्तै प्रचण्ड प्रधानमन्त्रीसमेत रहेका नेपाली कांग्रेसका सभापति शेरबहादुर देउवालाई भेट्न गएका छन् ।
एमालेको एकता प्रक्रिया चलिरहँदा प्रचण्डको दौड धुप भने अर्थपूर्ण मानिएको छ। एमालेका दोस्रो तहका नेता एकतामा जोड दिइरहँदा वरिष्ठ नेता नेपाल भने एकताको पक्षमा देखिएका छैनन्। उनले एकता कार्यदलले गरेको १० बुँदे सहमतिमा पनि असहमति जनाएका छन्।
नेता नेपालले विभिन्न सार्वजनिक अभिव्यक्तिमा केपी शर्मा ओलीसँग सँगै मिलेर जान नसक्ने संकेत गरेका छन्।
