बिहिबार, कार्तिक १२ २०८३
बिहिबार, कार्तिक १२ २०८३
शुक्रबार, असोज २ २०८३
काठमाडौँ । नेपाली कांग्रेसका पूर्वउपसभापति पूर्णबहादुर खड्काले पार्टी सभापति गगनकुमार थापालाई १५औँ महाधिवेशनको कार्यतालिका केही समय स्थगित गरेर पूर्वसभापति शेरबहादुर देउवासहित अग्रज नेताहरूसँग संवाद अघि बढाउन आग्रह गरेका छन्।
खड्काले बिहीबार सामाजिक सञ्जालमार्फत सभापति थापालाई सम्बोधन गर्दै असोज ३ गतेदेखि सुरु हुने भनिएको महाधिवेशनको कार्यतालिका केही समय सारेर पार्टीभित्रको विवाद समाधानका लागि पहल गर्न सुझाव दिएका हुन्।
उनले १४औँ महाधिवेशनबाट निर्वाचित सभापति देउवा तथा अन्य अग्रज नेतासँग थापाकै अग्रसरतामा तत्काल वार्ता–संवाद सुरु गर्न आग्रह गरेका छन्। पार्टीको एकता अझै सम्भव रहेको आफ्नो विश्वास रहेको खड्काको भनाइ छ।
‘दुईवटा महाधिवेशन भए विभाजन रोक्न कठिन हुन्छ’
खड्काले छुट्टाछुट्टै महाधिवेशनको प्रक्रिया अघि बढे कांग्रेस विभाजन हुन सक्ने चेतावनीसमेत दिएका छन्।
उनले थापालाई सम्बोधन गर्दै महाधिवेशनको कार्यतालिका स्थगित गरी अग्रज नेतासँग संवाद थाल्न आग्रह गरेका छन्। खड्काका अनुसार त्यसो नगरे पार्टीभित्रको विभाजन रोक्न कठिन हुन सक्छ।
खड्काले आफूहरूबीच वैशाख २१ गते भएको संवादपछि नै थापाले पछिल्लो निर्णय लिएको भए जेठको पहिलो साताभित्र कांग्रेसलाई एकताबद्ध गर्न सकिने अवस्था बन्ने आफ्नो धारणा पनि सार्वजनिक गरेका छन्। त्यसैले विगतका घटनाक्रम र प्राप्त सल्लाह–सुझावबारे गम्भीर आत्मसमीक्षा गर्न उनले थापालाई आग्रह गरेका छन्।
‘कानुन र विधानले समस्या पार्दैन’
खड्काले पार्टी एकताका लागि पहल गर्दा कानुन, अदालतको निर्णय वा पार्टी विधानले समस्या नपार्ने दाबी गर्दै थापालाई तत्काल निर्णायक कदम चाल्न आग्रह गरेका छन्।
उनले पार्टीको सम्पूर्ण एकताका लागि आफू कुनै महत्वाकांक्षाबाट मुक्त भएर आवश्यक त्याग र सहयोग गर्न तयार रहेको बताएका छन्।
खड्काले कांग्रेसभित्रको विवादले अन्य राजनीतिक दलमा समेत असर पर्न सक्ने र देशमा जातीय, क्षेत्रीय तथा धार्मिक द्वन्द्वको जोखिम बढ्न सक्ने आशंका पनि व्यक्त गरेका छन्। यी विषयमा उनले आफ्नो व्यक्तिगत विश्लेषण र आशंका प्रस्तुत गरेका हुन्।
कांग्रेसमा १५औँ महाधिवेशनलाई लिएर फरक–फरक कार्यतालिका अघि बढिरहेका छन्। थापा नेतृत्वको पक्षले असोज ३ गतेदेखि महाधिवेशन प्रक्रिया अघि बढाउने तयारी गरेको छ भने पार्टीभित्रको अर्को पक्षसँग महाधिवेशनको प्रक्रिया र नेतृत्वलाई लिएर मतभेद कायम रहेको समाचारहरूमा उल्लेख छ।
खड्काले आफ्नो धारणा सार्वजनिक गर्दै अन्ततः ‘सम्पूर्ण एकताको सिंगो कांग्रेसको सभापति’ बन्ने गरी पहल गर्न थापालाई आग्रह गरेका छन्।
