बुधबार, साउन १३ २०८३
बुधबार, साउन १३ २०८३
काठमाडौं । भारत भ्रमणमा रहेको नेपाली कांग्रेसको प्रतिनिधिमण्डलले उत्तर प्रदेशका मुख्यमन्त्री योगी आदित्यनाथलाई आज विहान भेटेको छ ।
उत्तरप्रदेशस्थित मुख्यमन्त्री आदित्यनाथको कार्यालय पुगेर नेपाली टोलीले मुख्य मन्त्रीलाई भेटेको हो ।
भेटमा नेपाल–भारत सम्बन्ध द्विपक्षीयहित तथा दुई देशबीचका राजनीतिक धार्मिक सांस्कृति ऐतिहासिक एवं जनताबीचको सम्पर्कका विविध आयामका बारेमा छलफल भएको प्रतिनिधिमण्डलको नेतृत्व गरेका कांग्रेस सहमहामन्त्री डा प्रकाशशरण महतले जानकारी दिए ।
मुख्यमन्त्री आदित्यनाथले नेपालसँग सम्बन्धित विविध मुद्दा एवं विषयवस्तुलाई भारतले सधैँ प्राथमिकतामा राखेको बताएका थिए । मुख्यमन्त्री योगीले नेपाल र नेपालीको रष्ट्रियता बलियो भए मात्रै भारतको हित हुने भएकाले नेपालको राष्ट्रियता सबल हुनुपर्नेमा जोड दिएका थिए ।
डा. महतले बनारसमा रहेको नेपाली मन्दिर हिन्दू करिडोर निर्माणका क्रममा विस्थापित हुनुसक्ने विषयमा चासो राखेको र मुख्यमन्त्री आदित्यनाथले उक्त मन्दिर त्यहाँबाट विस्थापित नहुने र उचित स्थानमा निर्माण हुने विषयमा आफूले निर्देशन दिइसकेको जानकारी दिएका थिए ।
भारतीय जनतापार्टीको निमन्त्रणामा तीनदिनअघि नेपाली टोली भारत गएको थियो । टोलीमा डा महतसँगै कांग्रेसका नेताद्वय उदयशमशेर राणा र अजय चौरसिया छन् । योगीसँगको भेटमा भारतीय जनतापार्टीका विदेश विभाग प्रमुख विजय चौथाइवाले र अर्का नेता आश्विन जोहर पनि सँगै थिए ।
