गण्डकी प्रदेशसभाको दशौँ अधिवेशन अन्त्य

पोखरा । गण्डकी प्रदेशसभाको दशौँ अधिवेशन अन्त्य भएको छ । प्रदेश सरकारको सिफारिसमा प्रदेश प्रमुख डिल्लीराज भट्टले नेपालको संविधानको धारा १८३ को उपधारा (२) बमोजिम सोमबार राति १२ बजेदेखि अधिवेशन अन्त्य गर्नुभएको हो ।

प्रदेशसभा सचिवालयले सोमबार सूचना जारी गर्दै चालु अधिवेशन २०८३ भदौ १५ गते राति १२ बजेदेखि लागू हुने गरी अन्त्य भएको जनाएको छ ।

गत जेठ ११ गतेदेखि सुरु भएको दशौँ अधिवेशन करिब तीन महिनापछि अन्त्य भएको हो । बजेट अधिवेशनका रूपमा सुरु भएको यस अधिवेशनबाट आर्थिक वर्ष २०८३/८४ को नीति तथा कार्यक्रम र बजेट पारित हुनुका साथै विभिन्न महत्वपूर्ण कानुन निर्माणको प्रक्रिया अघि बढाइएको थियो ।

नेपालको संविधानको धारा १८३ को उपधारा (२) मा प्रदेश प्रमुखले प्रदेशसभाको अधिवेशन अन्त्य गर्न सक्ने व्यवस्था छ । सोही संवैधानिक व्यवस्थाअनुसार प्रदेश मन्त्रिपरिषद्को सिफारिसमा प्रदेश प्रमुख भट्टले दशौँ अधिवेशन अन्त्य गरेको प्रदेशसभा सचिवालयले जनाएको छ ।