काठमाडौँ । जल तथा मौसम विज्ञान विभागले तातो दिन तथा तातो हावाको लहर (लु) सम्बन्धी विशेष बुलेटिन जारी गर्दै सर्वसाधारणलाई आवश्यक सावधानी अपनाउन आग्रह गरेको छ ।
विभागले शुक्रबार साँझ जारी गरेको बुलेटिनअनुसार आगामी तीन दिनसम्म लुम्बिनी प्रदेश र सुदूरपश्चिम प्रदेश का पहाडी तथा तराई भू–भागका केही स्थानमा अधिकतम तापक्रम ३८ डिग्री सेल्सियस वा सोभन्दा बढी रहने सम्भावना रहेको छ । केही स्थानमा तापक्रम ४० डिग्री सेल्सियसभन्दा माथि पुग्न सक्ने भन्दै विभागले सतर्कता अपनाउन अनुरोध गरेको हो ।
विभागका मौसमविद् सञ्जिव अधिकारी का अनुसार लुम्बिनी र सुदूरपश्चिम प्रदेशका तराई क्षेत्रमा आगामी तीन दिनसम्म मध्यम तातो हावाको लहर तथा पहाडी क्षेत्रमा तातो दिन रहने सम्भावना छ ।
उहाँका अनुसार सुदूरपश्चिमका पहाडी र तराई भू–भाग तथा लुम्बिनी प्रदेशका केही तराई क्षेत्रमा यही जेठ ६ गतेदेखि नै ४० डिग्री सेल्सियसभन्दा बढी तापक्रम मापन भइरहेको छ । साथै दुवै प्रदेशका केही स्थानमा तापक्रम ३८ डिग्री सेल्सियसभन्दा माथि पुगेको विभागले जनाएको छ ।
प्रभावित जिल्ला
विभागले कञ्चनपुर, कैलाली, डोटी, बर्दिया, बाँके र दाङ जिल्लामा विशेष सतर्कता अपनाउन आग्रह गरेको छ ।
यस्तै बैतडी, डडेलधुरा, अछाम, सुर्खेत, सल्यान, रोल्पा, प्युठान, पाल्पा, अर्घाखाँची, रुपन्देही र कपिलवस्तु जिल्लालाई निगरानी तथा अद्यावधिक गर्नुपर्ने सूचीमा राखिएको छ ।
स्वास्थ्यमा पर्न सक्ने असर
विभागका अनुसार अत्यधिक गर्मीका कारण थकान, कमजोरी, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशी दुख्ने तथा बान्ता हुनेजस्ता समस्या देखिन सक्छन् ।
विभागले सुझाएका सावधानी
अत्यधिक गर्मीको समयमा घरभित्र वा चिसो स्थानमा बस्ने
अनावश्यक रूपमा बाहिर ननिस्किने
चर्को घाममा हिँडडुल नगर्ने
हल्का र सुतीका कपडा लगाउने
बाहिर जाँदा टाउको छोप्ने वा टोपी प्रयोग गर्ने
नियमित रूपमा प्रशस्त पानी, जुस तथा झोल पदार्थ सेवन गर्ने
स्वास्थ्य समस्या देखिएमा स्वास्थ्यकर्मीसँग सम्पर्क गर्ने
विभागले दैनिक मौसम पूर्वानुमान बुलेटिन नियमित रूपमा हेरेर अद्यावधिक मौसमी जानकारी लिन पनि अनुरोध गरेको छ ।
