सर्लाही झरेका कांग्रेस सभापति

काठमाडौं । नेपाली कांग्रेसका सभापति एवं प्रधानमन्त्रीका दाबेदार गगन थापा चुनावका निम्ति मधेस झरेका छन्। राजनीतिक रुपमा उनको यो निर्णयलाई आश्चर्यजनक पनि मानिएको छ।

तीन पटकसम्म काठमाडौँ–४ बाट भारी मतान्तरले विजयी भएका थापा यसपटक मधेशको ’कोर’ मानिने सर्लाही–४ बाट चुनावी मैदानमा उत्रिएका हुन्। उनको यो निर्णयले एकातिर कांग्रेस कार्यकर्तामा उत्साह थपेको छ भने अर्कोतिर राजनीतिक जोखिमको चर्चा पनि चुलिएको छ।

थापाले आफूलाई केवल काठमाडौँको नेतामा मात्र सीमित नगरेर ‘राष्ट्रिय कद’ को नेताका रूपमा स्थापित गर्न चाहेका छन्। पहाडमा जन्मेको र काठमाडौँमा हुर्केको नेताले मधेशको माटो र मुद्दालाई नबुझी देशको नेतृत्व गर्न नसक्ने उनको तर्क छ। उनी मधेशसँग भावनात्मक र राजनीतिक सम्बन्ध गाँसेर ’राष्ट्रिय दृष्टिकोण’ बनाउन चाहन्छन्।

पछिल्लो समय काठमाडौँमा बालेन शाह र रास्वपाको बढ्दो प्रभावका कारण परम्परागत दलका लागि चुनौती थपिएको छ। काठमाडौँ–४ मा रास्वपाले पुकार बमलाई मैदानमा उतारेको छ भने एमालेले पुनः राजन भट्टराईलाई अघि सारेको छ। आफ्नो निर्वाचन क्षेत्रमा मात्रै केन्द्रित हुनुपर्ने बाध्यतालाई तोडेर देशभर कमान्ड गर्न थापाले मधेश झर्ने निर्णय गरेको देखिन्छ।

मधेशमा पछिल्लो समय क्षेत्रीय दल र नयाँ शक्तिहरूको उदयले कांग्रेसको पकड खुकुलो हुँदै गएको छ। पार्टी सभापतिका रूपमा थापा आफैँ मधेशबाट चुनाव लड्दा देशभरका मधेशी मतदातामा सकारात्मक सन्देश जाने र पार्टीको संगठन सुदृढ हुने विश्वास लिइएको छ।

सर्लाही–४ मा थापाको प्रतिस्पर्धा निकै रोचक हुने देखिएको छ। यहाँ उनलाई राष्ट्रिय स्वतन्त्र पार्टी (रास्वपा) बाट चुनाव लडिरहेका निवर्तमान सांसद डा. अमरेश कुमार सिंहले कडा टक्कर दिँदैछन्। सिंह सो क्षेत्रका पुराना खेलाडी हुन्, जसले गत निर्वाचनमा स्वतन्त्र लडेर कांग्रेसकै आधिकारिक उम्मेदवारलाई हराएका थिए।

गगन थापाले सर्लाहीमा हाइटेक र ग्रासरुट दुवै शैलीको प्रचार अपनाएका छन्। उनले मधेशको शिक्षा, स्वास्थ्य र सूचना प्रविधिमा आधारित विकासको एजेन्डा अघि सारेका छन्। “म यहाँ नेता बन्न होइन, मधेशको छोरो बन्न आएको हुँ,“ भन्दै उनले स्थानीय भाषा र संस्कृतिसँग घुलमिल हुने प्रयास गरिरहेका छन्।

सुरक्षा निकायले सर्लाही–४ लाई अति संवेदनशील सूचीमा राखेको छ। विगतका चुनावहरूमा यहाँ हिंसात्मक झडपका घटनाहरू भएका छन्। यद्यपि, थापाको आगमनले यस क्षेत्रमा वैचारिक बहस सुरु भएको छ। एमालेका रविसिंह कुशवाहा र नेकपाका रजनीश राय यादव पनि मैदानमा रहेकाले यहाँ त्रिपक्षीय वा बहुपक्षीय भिडन्त हुने निश्चित छ।

काठमाडौँको आफ्नो सिटमा आफ्ना विश्वासपात्र सचिन तिमल्सेनालाई सुम्पिएर सर्लाही झरेका गगनको यो कदमले उनको आगामी राजनीतिक भविष्य तय गर्नेछ। यदि उनी यहाँबाट निर्वाचित भएमा उनको प्रधानमन्त्री बन्ने दाबी अझ बलियो हुनेछ भने हारले उनको नेतृत्वमाथि प्रश्न उठाउने ठाउँ दिनेछ।