सोमबार, कार्तिक १६ २०८३
सोमबार, कार्तिक १६ २०८३
काठमाडौं । नेकपा ओली पक्षले काठमाडौँको नारायणहिटी संग्राहलय अगाडि बृहद जनसभा गरेर प्रतिनिधिसभाको औचित्य पुष्टि गर्ने प्रयास गर्नुका साथै गणतन्त्र र संघीयताको पक्षमा आफूलाई उभ्याएको दावी गरेको छ । नेकपा ओली पक्षको वागमती प्रदेशस्तरीयसभालाई शुक्रबार काठमाडौँमा सम्बोधन गर्दै प्रधानमन्त्रीसमेत रहेका केपी शर्मा ओली, उपप्रधानमन्त्री ईश्वर पोखरेल तथा गृहमन्त्री रामबहादुर थापा ‘बादल’ले पार्टीका नेताहरु (प्रचण्ड–माधव) पक्षले नै सरकारलाई काम गर्न नदिएकाले प्रतिनिधिसभा विघटन गर्दै ताजा जनादेशका लागि निर्वाचनमा जाने घोषणा गरेको औचित्य पुष्टि गर्ने प्रयास गरे ।
प्रतिनिधिसभा भंग गर्ने सरकारको निर्णयलाई प्रतिगामी र असंवैधानिक भन्दै त्यसविरुद्ध सबै राजनीतिक दलहरु आन्दोलनमा उत्रिएका बेला प्रधानमन्त्री ओली र उनको पार्टीका नेताहरुले ओली नेतृत्वको नेकपा नै नेकपाको मुल पार्टी मात्रै नभएर देशकै मुल पार्टी भन्दै संघीयता र गणतन्त्रको रक्षा पनि यसैले गर्ने दावी गरे ।
ओलीको प्रश्न–सहभागीको उत्तर
प्रधानमन्त्री केपी ओलीले जनसभालाई सम्बोधन गर्दै जनताले चुनाव चाहेको पनि दावी गरे । उनले सभामा सहभागिलाई नारा लगाएको शैलीमा सोध्दै भने–अस्थिरता होइन, जनता के चाहन्छ ? जनता के चाहन्छ?’ ओलीको प्रश्नात्मक भीडबाट नेता कार्यकर्ताले भने, ‘चुनाव चाहियो..!’
त्यसपछि ओलीले उत्साहित हुँदै अब अस्थिरता होइन जनताले चुनाव चाहेकाले देश चुनावमा होमिएको प्रस्ट्याउने प्रयास गरे । उनले देश चुनावतर्फ गएको भन्दै कसको नेतृत्वमा सरकार बन्छ भन्ने जनताले नै फैसला गर्ने बताए ।
‘अब देशक चुनावतिर गयो–गयो सबै कुरा चुनावले फैसला गर्छ’, उनले भने । सो क्रममा नेता कार्यकर्ताले ओलीको समर्थनको पक्षमा नाराबाजी गरेका थिए ।
इतिहासकै ठूलो जनसभा !
प्रधानमन्त्री ओलीले काठमाडौंमा शुक्रबारको सभा इतिहासकै ठूलो जनसभा भएको पनि दाबी गरे । उनले भ्रम फिजाउने तत्त्वहरुलाई चिरेर जनसभामा खडा भएको भन्दै नेता कार्यकर्ताको प्रशंसा पनि गरे । आफूहरुको जनसभा विथोल्न कतिपय ठाउँमा प्रचण्ड–नेपाल समूहले बम राखेर विप्लव लेख्ने काम भएको भन्दै जनसभा विथोल्नकै लागि हिजो हड्ताल भएको ओलीको दावी थियो ।
शुक्रबारको सम्बोधनका क्रममा ओलीले विप्लव समूहलाई लगाएको प्रतिबन्ध फुकुवा गर्ने कतिपयको अनुमानविपरित त्यस्तो कुनै घोषणा भने गरेनन् ।
