शनिबार, कार्तिक २१ २०८३
शनिबार, कार्तिक २१ २०८३
शनिबार, कार्तिक २१ २०८३
चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीका नेता तथा कार्यकर्तालाई जनताको अपेक्षाअनुसार उच्च राजनीतिक चरित्र प्रदर्शन गर्न निर्देशन दिएका छन्।
रास्वपा चितवनले बिहीबार आयोजना गरेको विशेष सम्बोधन कार्यक्रममा उनले पार्टी सरकारको नेतृत्वमा पुगेपछि नेता तथा कार्यकर्ताको व्यवहार र गतिविधि थप जिम्मेवार हुनुपर्ने बताएका हुन्।
पार्टीका नेता तथा कार्यकर्ताका गतिविधिलाई समाजले मूल्याङ्कन गरिरहेको उल्लेख गर्दै लामिछानेले आलोचना गर्ने समाजमाथि आक्रामक हुनु राजनीतिक चरित्र नभएको बताए। समाजले देखाएका कमजोरी स्वीकार गरी सुधार गर्नुपर्ने उनको भनाइ थियो।
‘ऐनाले आफ्नो अनुहार देखाएपछि ऐना देखाउनेतिर झम्टिने त्यो राजनीतिक चरित्र होइन,’ उनले भने।
जनताले रास्वपालाई १८२ सिटसहित सरकारको नेतृत्व गर्ने अवसर दिएको उल्लेख गर्दै उनले त्यसलाई अहङ्कारको विषय बनाउन नहुने बताए। पार्टीभित्र माथिदेखि तलसम्म देखिएका कमजोरी सुधार्न निर्देशन दिँदै उनले बदला लिने भावनाले काम नगर्न पनि आग्रह गरे।
‘हामी रास्वपाका हौँ भन्दै प्रशासन र प्रहरीलाई राजनीतिक दबाब दिने काम गर्यौँ भने त्यो चरित्रले हामीलाई धेरै पर लैजाँदैन,’ उनले भने, ‘हामीले भुइँ टेक्नुपर्छ, भुइँ छोड्नुहुँदैन।’
जनताले दिएको अभिमतलाई उनीहरूकै अपमान हुने गरी प्रयोग नगर्न चेतावनी दिँदै लामिछानेले पार्टी ठूलो भएको भन्दै प्रहरी, प्रमुख जिल्ला अधिकारीलगायत राज्यका निकाय आफूहरूको नियन्त्रणमा रहेको ठान्ने अहङ्कार त्याग्नुपर्ने बताए। उनले पार्टीभित्र एकता कायम राख्न पनि आग्रह गरे।
‘हामी यही माटोका मान्छे हौँ। एक चुनाव जित्दैमा हामी विशेष प्राणी बनेका छैनौँ,’ उनले भने।
पार्टीभित्र मतभेद र अन्तरसङ्घर्ष नरहेको दाबी गर्दै उनले सरकारले जनअपेक्षाअनुसार काम गरोस् भन्ने उद्देश्यले पार्टीले सुझाव दिने गरेको स्पष्ट पारे। सरकारका कामकारबाहीमा सुधारका लागि सुझाव दिनुलाई विवादका रूपमा लिन नहुने उनको भनाइ थियो। पार्टीले सरकारको काममा बाधा अवरोध नगर्ने पनि उनले बताए।
लामिछानेले अदालत, प्रहरी र प्रेसलगायत सार्वजनिक संस्थाका विषयमा अनावश्यक टिप्पणी नगर्न नेता तथा कार्यकर्तालाई आग्रह गरे। सार्वजनिक संस्थालाई कमजोर बनाउँदा देश र लोकतन्त्र दुवै कमजोर हुने उनको भनाइ थियो।
‘अदालत, प्रहरी, प्रेसलगायत भएभरका संस्था कमजोर भए देश कमजोर हुन्छ, लोकतन्त्र रहन सक्दैन,’ उनले भने।
सुशासन कायम गर्न भ्रष्टाचार नियन्त्रण आवश्यक रहेको उल्लेख गर्दै सभापति लामिछानेले त्यसका लागि विधिको शासनअनुसार अनुसन्धान र कारबाही हुनुपर्नेमा जोड दिए। अनुसन्धान नगरी कसैलाई दोषी ठहर गर्ने र पक्राउ गर्ने प्रवृत्ति उचित नहुने बताउँदै उनले भ्रष्टाचार नियन्त्रणका नाममा कानुनी प्रक्रिया मिच्न नहुने धारणा राखे।
उनले भ्रष्टाचार नियन्त्रणको विषय विगतदेखि नै रास्वपाले उठाउँदै आएको स्मरण गराउँदै निष्पक्ष अनुसन्धान र कानुनसम्मत कारबाहीमा जोड दिए।
