मंगलबार, कार्तिक १७ २०८३
मंगलबार, कार्तिक १७ २०८३
आइतबार, जेष्ठ १० २०८३
गण्डकी। पोखरा उपत्यका नगर विकास समितिले पोखरा बसपार्क क्षेत्रभित्र निर्माण गरिएका पसल कबलसहित सबै अतिक्रमित संरचना १५ दिनभित्र हटाउन सार्वजनिक सूचना जारी गरेको छ ।
समितिले पोखरा घरदेखि सेती पुलसम्म, पृथ्वी राजमार्गदेखि दक्षिण, विमानस्थलदेखि उत्तर तथा पूर्वमा सेती नदीसम्मको क्षेत्रमा बनाइएका संरचना हटाएर आधुनिक बसपार्क निर्माण प्रक्रियामा सहयोग गर्न व्यवसायी तथा स्थानीयलाई आग्रह गरेको हो ।
समितिले तोकिएको समयभित्र संरचना नहटाए आफूले नै हटाउने र त्यस क्रममा लाग्ने सम्पूर्ण खर्च सम्बन्धित व्यक्ति वा संस्थाबाट असुल गरिने चेतावनी दिएको छ ।
त्यसैगरी, बसपार्क क्षेत्रभित्र लालपुर्जा भएका जग्गाधनीलाई सात दिनभित्र नागरिकता, जग्गाधनी प्रमाणपुर्जा, चालु आर्थिक वर्षको भूमिकर वा सम्पत्ति कर तिरेको रसिद तथा जग्गासम्बन्धी अन्य कागजात समितिको कार्यालयमा बुझाउन निर्देशन दिइएको छ ।
यसअघि पोखरा महानगरपालिकाले गत वैशाख ४ गते नै पृथ्वीचोकस्थित बसपार्क क्षेत्रका अतिक्रमित संरचना हटाउन ३५ दिने सूचना जारी गरेको थियो । उक्त अवधि शनिबार सकिएसँगै नगर विकास समितिले पुनः अर्को सूचना जारी गरेको हो ।
पोखरा उपत्यका नगर विकास समितिको स्वामित्वमा रहेको बसपार्क क्षेत्रको जग्गामा हाल सुकुमवासी, भूमिहीन दलित तथा अव्यवस्थित बसोबासीको बसोबास रहेको छ । विसं २०३१/३२ मा आधुनिक सुविधासम्पन्न बसपार्क निर्माणका लागि २०५ रोपनी जग्गा अधिग्रहण गरिएको भए पनि अतिक्रमणका कारण हाल करिब ६० रोपनी मात्र बाँकी रहेको बताइएको छ ।
महानगरपालिकाका अनुसार बसपार्क क्षेत्रभित्र झण्डै ५०० परिवारले घरटहरा बनाएर बसोबास गरिरहेका छन् । वास्तविक सुकुमवासीको उचित व्यवस्थापन गर्दै अतिक्रमित जग्गा खाली गराएर आधुनिक बसपार्क निर्माण अघि बढाइने महानगरको योजना छ ।
