काठमाडौँ । नयाँ वर्ष २०८३ को अवसरमा रामचन्द्र पौडेल, रामसहायप्रसाद यादव र बालेन्द्र साहले देश तथा विदेशमा रहेका सम्पूर्ण नेपालीलाई साझा राष्ट्रिय लक्ष्य प्राप्तिका लागि एकताबद्ध हुन आह्वान गरेका छन् ।
शुभकामना सन्देश जारी गर्दै उनीहरूले सम्पूर्ण नेपालीमा सुख, शान्ति, समृद्धि र सुस्वास्थ्यको कामना गर्दै राष्ट्र निर्माणमा एकजुट भएर अघि बढ्न आग्रह गरे।
राष्ट्रपति रामचन्द्र पौडेल ले नयाँ वर्षलाई साझा राष्ट्रिय लक्ष्य निर्धारण गर्ने र त्यसको प्राप्तिका लागि सङ्कल्प गर्ने महत्वपूर्ण अवसरका रूपमा लिनुपर्ने बताउनुभयो। उहाँले लक्ष्य प्राप्तिका लागि विधि र विधानको पालना, सुसंस्कृत व्यवहार तथा अनुशासन आवश्यक रहेकोमा जोड दिए। साथै, हालै सम्पन्न निर्वाचनपछि बनेको नयाँ सरकारबाट जनताले विधिको शासन, दिगो शान्ति, सुशासन तथा सामाजिक न्यायसहितको विकासको अपेक्षा राखेको उल्लेख गर्दै त्यसतर्फ अग्रसर हुनुपर्ने बताए। उनले सङ्घीय लोकतान्त्रिक गणतन्त्रका आदर्शप्रति प्रतिबद्ध रहँदै राष्ट्रिय एकता, विश्वास र सहिष्णुतालाई सुदृढ बनाउन आग्रह गरे ।
उपराष्ट्रपति रामसहायप्रसाद यादव ले नयाँ वर्षलाई सकारात्मक सोच, अनुशासन र स्वस्थ जीवनशैलीको सुरुवात गर्ने अवसरका रूपमा उपयोग गर्न आग्रह गरे। उनले सामाजिक सहिष्णुता, भाइचारा र राष्ट्रिय एकतालाई मजबुत बनाउँदै आर्थिक विकास, शिक्षा, स्वास्थ्य र वातावरण संरक्षणका क्षेत्रमा सहकार्य गर्नुपर्ने बताए। साथै, सतुवाइन, जुडशीतल, सिरुवा पावनी र बिस्का जात्रा जस्ता पर्वहरूले सामाजिक सद्भाव र सांस्कृतिक विविधता सुदृढ बनाउने उल्लेख गर्दै शुभकामना व्यक्त गरे ।
प्रधानमन्त्री बालेन्द्र साहले पनि नयाँ वर्षका अवसरमा नागरिकको सुख, शान्ति र आरोग्यको कामना गरे। उनले संस्कृत श्लोक ‘सर्वे भवन्तु सुखिनः सर्वे सन्तु निरामयाः…’ उद्धृत गर्दै सबैको जीवनमा कल्याण र सुखसमृद्धि कायम होस् भन्ने शुभेच्छा व्यक्त गरे।
नयाँ वर्षको अवसरमा देशभरका राजनीतिक दलका शीर्ष नेता, जनप्रतिनिधि तथा विशिष्ट व्यक्तित्वहरूले पनि शुभकामना सन्देश दिँदै राष्ट्रिय एकता, समृद्धि र विकासका लागि सहकार्य गर्न आह्वान गरेका छन्। नेपालीहरूले हरेक वर्ष वैशाख १ गते नयाँ वर्ष मनाउँदै आएका छन्।
