काठमाडौं । नेपाल उद्योग वाणिज्य महासंघको आसन्न निर्वाचनसँगै चुनावी सरगर्मी उत्कर्षमा पुगेको बेला वर्तमान अध्यक्ष चन्द्रप्रसाद ढकालको अभिव्यक्तिले निजी क्षेत्रको राजनीतिमा नयाँ तरङ्ग सिर्जना गरेको छ।
आगामी हप्ताको निर्वाचनमा दुई स्पष्ट प्यानलबीच प्रतिस्पर्धा हुने संकेत देखिइरहेका बेला अध्यक्ष ढकालले भावी अध्यक्षका रूपमा स्वतः चयन हुने वरिष्ठ उपाध्यक्ष अञ्जन श्रेष्ठलाई गुटबन्दी नगर्न र तटस्थ रहन चेतावनी दिएका हुन् ।
महासंघको विधानअनुसार वरिष्ठ उपाध्यक्ष स्वतः अध्यक्ष हुने व्यवस्था रहेकाले श्रेष्ठ आगामी कार्यकालका ‘कन्फर्म’ अध्यक्ष मानिन्छन्। तर, उनले पर्दापछाडि आफ्नै प्यानल बनाएर चुनावी अभियानमा सक्रिय भएको आरोप ढकालले लगाएका छन्। यस्तो गतिविधि विधानको मर्मविपरीत भएको उनको टिप्पणी छ।
ढकालले वरिष्ठ उपाध्यक्ष प्रणालीको उद्देश्य नेतृत्व तयार पार्नु र भावी अध्यक्षलाई निष्पक्ष बनाउनु रहेको स्मरण गराउँदै अहिले त्यसको दुरुपयोग भइरहेको बताएका छन्। उनका अनुसार, भावी अध्यक्षबाटै ‘मेरो पक्ष’ भन्दै पम्पलेट वितरण हुनु संस्थाको निष्पक्षतामाथि प्रश्न उठाउने विषय हो।
अहिलेसम्म आफू सर्वसम्मत नेतृत्वको पक्षमा रहेको बताउँदै ढकालले यदि श्रेष्ठले गुटबन्दी नत्यागे आफू पनि मौन नबस्ने चेतावनी दिएका छन्। उनले आवश्यक परे अर्को पक्षको खुलेर समर्थन गर्ने संकेतसमेत गरेका छन्।
ढकालले आफ्नो तीन वर्षे कार्यकालमा महासंघका प्रमुख एजेन्डाहरू सफलतापूर्वक कार्यान्वयन भएको दाबी गर्दै नयाँ नेतृत्वका लागि स्पष्ट एजेन्डा नै बाँकी नरहेको व्यङ्ग्य गरेका छन्। विशेषगरी ‘निजी क्षेत्र संरक्षण तथा प्रवर्द्धन रणनीति’ क्याबिनेटबाट पारित हुनु आफ्नो कार्यकालको ठूलो उपलब्धि भएको उनले बताए।
दुईतिहाइ नजिकको बलियो सरकार भएको वर्तमान अवस्थामा निजी क्षेत्र विभाजित हुनु दुर्भाग्यपूर्ण हुने उनको भनाइ छ। महासंघको शक्ति एकतामा रहेको उल्लेख गर्दै गुटबन्दीले सरकारसँगको बार्गेनिङ क्षमता कमजोर बनाउने उनले चेतावनी दिएका छन्।
अध्यक्ष ढकालको यस अभिव्यक्तिले निर्वाचनको अन्तिम चरणमा नयाँ समीकरण बन्ने संकेत देखिएको छ। अब भावी अध्यक्ष श्रेष्ठले तटस्थता अपनाउने वा प्यानल राजनीतिमा अघि बढ्ने भन्ने विषयले महासंघको नेतृत्वको दिशा तय गर्नेछ। सर्वसम्मत नेतृत्व चयन हुन्छ वा कडा प्रतिस्पर्धा—यसको टुंगो आगामी निर्वाचनले लगाउनेछ।
