बुधबार, साउन १३ २०८३
बुधबार, साउन १३ २०८३
काठमाडौं पुस, २१–
अमेरिकी राष्ट्रपति डोनाल्ड ट्रम्प सम्बन्धी विवादास्पद पुस्तकका लेखकले समय अगावै उक्त पुस्तक सार्वजनिक हुने बताएका छन् ।
ट्रम्पका वकिलहरुले उक्त पुस्तकमाथि रोक लगाउने प्रयास गरेपछि उनले यस्तो बताएका हुन् ।
माइकल उल्फले लेखेको ‘फायर एण्ड फ्युरी’ नामक पुस्तक तोकिएको मितिभन्दा चार दिनअघि शुक्रवार सार्वजनिक हुने भएको छ ।
लेखकले ट्वीटमार्फत पुस्तक सार्वजनिक गर्ने निर्णय घोषणा गर्दै लेखेका छन्, ‘भोलि किताब किन्न सकिनेछ । धन्यवाद राष्ट्रपति ।’
ट्रम्पका वकिलहरुले उक्त पुस्तकमा थुप्रै गलत विवरणहरु रहेको बताएका छन् ।
पुस्तकमा ट्रम्पका पूर्व प्रमुख रणनीतिकार स्टिभ ब्याननलाई उद्धृत गर्दै राष्ट्रपतीय चुनाव अघि रुसी समूहसँगको भेटलाई ‘देशद्रोह’ भन्दै व्याख्या गरिएको छ ।
उक्त पुस्तकमा राष्ट्रपतिको चुनाव जितेपछि ट्रम्प आफैँ चकित परेको पनि उल्लेख गरिएको छ ।
ह्वाइट हाउसले पुस्तकको सत्यताबारे प्रश्न उठाएको छ ।
गत अगष्टमा पदबाट बर्खास्त गरिएका ब्याननले मानसिक सन्तुलन गुमाएको भन्दै ट्रम्पले टिप्पणी गरेका छन् ।
यसअघि ट्रम्पका वकिलले उल्फले कानुनी कारबाहीको सामना गर्नुपर्ने बताएका थिए ।
जन सोपेल भन्छन्, “यदी यो पुस्तकको आधा मात्रै विषयहरु सत्य भए, त्यसले राष्ट्रपति र अस्तव्यस्त ह्वाइट हाउसको नराम्रो तस्वीर बाहिर ल्याउने छ । ट्रम्प एकदमै रिसाएकामा कुनै आश्चर्य छैन ।”
वासिङ्टन पोस्टले प्रकाशित गरेको सूचनामा, लेखक र प्रकाशकले थप प्रकाशन र वितरण तत्काल रोक्नुपर्ने उल्लेख छ ।
उक्त सूचनामा, उल्फले पुस्तकमा ट्रम्पबारे थुप्रै गलत र आधारहीन विवरणहरु समेटेको आरोप लगाइएको छ । बीबीसी
