बुधबार, साउन १३ २०८३
बुधबार, साउन १३ २०८३
नुवाकोट भदौ, २८–
नुवाकोट कांग्रेसका सभापति जगदीश्वरनरसिंह केसीलाई कारवाहीको माग गर्दै केन्द्रीय कार्यालयमा उजुरी परेको छ । बेलकोटगढी नगरपालिकाका नेपाली कांग्रेसबाट प्रमुखसहित विभिन्न उम्मेदवारले सभापति केसीलाई कारवाहीको माग गर्दै पत्र बुझाएका हुन् । वैशाख ३१ गते भएको स्थानीय तह निर्वाचनमा अन्तरघात गरेको आरोप लगाई जिल्ला सभापति केसी सहित अन्य नेतालाई पनि कारवाहीको माग गर्दैै केन्द्रीय कार्यालयमा पत्र बुझाईएको हो ।
बेलकोटगढीमा प्रमुखमा पराजित यादव नेपाल, उपप्रमुखका प्रत्याशी हिरा तिवारी शर्मासहितको टोलीले जिल्ला सभापति तथा सांसद जगदीश्वरनरसिंह केसीलगायतले अन्तरघात गरेको जनाउँदै कारवाही गर्न केन्द्रीय कार्यालयमा सूची बुझाएका हुन् । जिल्ला सभापति केसीसहित कारवाहीको लागि सिफारिस गरिएकाहरुमा जिल्ला सदस्य हिरा पाण्डे लामा, क्षेत्रीय सदस्य कृष्णप्रसाद पाण्डे, साबिक बेलकोट गाविसका पार्टी सभापति वैकुण्ठ पाण्डे र साबिक जिलिङ गाविसका पार्टी सभापति गोकुलप्रसाद दाहाल रहेका छन् । उनीहरु सबैलाई अन्तरघात गरेको आरोप लगाइएको छ ।
यस्तै, पूर्व जिल्ला सभापति तथा विदुर नगरपालिकाका प्रमुखका पराजित उम्मेदवार ध्रुव अधिकारीको नेतृत्वमा गएको अर्को टोलीले पनि केन्द्रीय कार्यालयमा अन्तरघात गर्नेको सूची बुझाई कारवाहीका लागि माग गरेको छ ।
उक्त सूचीमा जिल्ला सदस्य विन्दा अर्याल, नेता वासु सापकोटा, तारकेश्वर गाउँपालिकाका पार्टी संयोजक होमबहादुर तामाङ, पूर्वमहासमिति सदस्य मोहनबहादुर खड्कालगायत १९ नेता तथा कार्यकर्ताका नाम रहेको छ ।
तारकेश्वरबाट कांग्रेसका पराजित उम्मेदवार चोकराज शाक्यका अनुसार जिल्ला तहकाले कारवाहीका लागि कुनै सिफारिस र सोधपुछसमेत नगरेपछि केन्द्रमा पुग्नुपरेको हो ।
पूर्वसभापति अधिकारीले निर्वाचनमा अन्तरघात गर्नेहरु कारवाहीको दायरामा आउँछन् भन्ने अनूभूति नभए कार्यकर्तामा निराशा बढ्ने बताए । कारवाही गराउन माग गर्दै निर्वाचनका पराजित उम्मेदवारसहित ७७ जनाले हस्ताक्षर गरेका छन् ।
