आफ्ना नेताहरु खोसिने डरमा नेपाल समूहका नेता सुरक्षित स्थान खोज्दै चन्द्रागिरी रिसोर्टमा

काठमाडौं भाद्र ७ ।  एमालेबाट विभाजित हुन लागेको माधव नेपाल समूहका नेताहरु एकान्तवासकालागि चन्द्रागिरी रिसोर्टमा भेला भएका छन् । निर्वाचन आयोगमा सनाखतको दिन नजिकिदै गर्दा नेपाल समूहले आफ्ना नेतालाई रिसोर्टमा जम्मा गरेको हो ।  

प्रस्तावित नेकपा एकीकृत समाजवादी का नेताहरूलाई आवासीय भेलामा लैजानुको उद्देश्य भनेको नेताहरु दायाँबायाँ नहुन् भन्ने उद्देश्य नै रहेको एक नेताले बताए । 
ती नेताका अनुसार उनीहरूका लागि  ५० बेड बुकिङ गरिएको छ । अपुग भए अन्य बेड पनि तयारी अवस्थामा राखिएको छ ।

एकान्तबासमा   नेपाल निकट केन्द्रीय सदस्य र सांसदहरू छन् ।  तेस्रो धारका नेताहरूले आफू पक्षकालाई प्रभावित पार्न सक्ने आकलन गरेको नेपाल समूहले  उनीहरूलाई आफ्नो पक्षबाट दायाँबायाँ हुन नदिन रिसोर्टमा पुर्‍याएका हुन् । सनाखत हुने दिन बुधबारसम्मै नेताहरुलाई रिसोर्टमा राखिने तयारी छ ।