भागरथी हत्याको सफलतानजिक पुगेको प्रहरीको दाबी

निर्मलाको जस्तै भागरथीका हत्यारा पत्ता नलाग्ने हो कि भन्ने आशंका पैदा भइरहेको बेला प्रहरीले भने सफलता नजिक पुगको जनाएको छ। सूक्ष्म अनुसन्धान र अध्ययन भइरहेकोले सफलतानजिक पुगेका बैतडीका प्रहरी प्रमुख, प्रहरी नायव उपरीक्षक नारायणप्रसाद अधिकारीले जानकारी दिए।  

उनले भने, ‘विभिन्न कोणबाट अध्ययन,अनुसन्धान गरिरहेका छौं, छिट्टै सफलता प्राप्त गर्छौं’, उनले थपे, ‘अनुसन्धान साँघुरिँदै गएको छ, हामी सफलताको एकदमै नजिक छौं,अहिले नै सबै कुरा भन्न मिल्दैन।’

घटनाको थप अनुसन्धानका लागि भागरथीको भजाइनल स्वाब र सबुत प्रमाण परीक्षणका लागि काठमाडौं पठाइएको छ। यसका साथै घटना भएको दिन उक्त बाटो भएर हिँडडुँल गर्ने व्यक्ति, सवारी साधनमा आवतजावत गर्ने शंकास्पदमाथि सोधपुछको काम भइरहेको प्रहरीले जनाएको छ।

भागरथीका आफन्तसँग सोधपुछ गर्नुका साथै शंकास्पद व्यक्तिमाथि निगरानी बढाएर सूक्ष्म अध्ययन भइरहेको जिल्ला प्रहरी कार्यालय बैतडीले जनाएको छ। सुदूरपश्चिम प्रदेश प्रहरी कार्यालयका प्रमुख प्रहरी नायब महानिरीक्षक डिआइजी उत्तमराज सुवेदी नेतृत्वको टोलीले घटना अनुसन्धान  गरिरहेको छ।

उक्त टोलीमा प्रदेश प्रहरी कार्यालयका वरिष्ठ उपरीक्षक जनकराज पाण्डे, केन्द्रीय अनुसन्धान ब्युरोका डिएसपी पञ्चकुमार बाँखुसहित प्राविधिक छन्।