बुधबार, साउन १३ २०८३
बुधबार, साउन १३ २०८३
प्रहरी प्रमुखहरुको दलबलसहित बुटवल आईपुगेका गृहमन्त्री रामबहादुर थापा ‘बादल’ लाई नेत्रबिक्रम चन्दले नेतृत्व गरिरहेको प्रतिवन्धित नेकपाले रातो पोष्टरले स्वागत गरेको छ ।
हिजो सोमबारदेखि शुरु भएको प्रदेशस्तरीय गोष्ठीमा आज मंगलबार गृहमन्त्री थापा प्रमुख अतिथिका रुपमा सहभागी हुन बुटवल आउदा विप्लव समूहका कार्यकताले रातारात बजारभरी पोष्टर टाँसेका थिए ।
प्रदेश नंं। ५ का १२ जिल्लाका प्रमुख जिल्ला अधिकारी, नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धानका प्रमुखको सहभागिता रहेको उक्त गोष्ठीमा आउदै गरेका सुरक्षा अंगका प्रमुखहरु र मुलुकको शान्ति सुरक्षाको जिम्मेवारी बोकेका गृहमन्त्री आउदै गर्दा विप्लव कार्यकर्ताहरुले पोष्टर छ्याप्छ्याप्ती पारेर चुनौती दिएका छन् ।
विप्लव नेतृत्वको युवा संगठनको मध्यपश्चिम कमान्डले बुटवलको व्यस्त स्थानमा सो पार्टीको पोस्टर टाँसेको बताईएको छ । इलाका प्रहरी कार्यालय बुुटवलमा डीएसपी भीमलाल भट्टराईले यस क्षेत्रमा विप्लव समूहको कुनै गतिविधि नभएको दाबी गरेपनि बुटवलका ठाउँठाउँमा विप्लव समूहको रंगिन रातो पोस्टर टाँसेका थिए । सोमबार राति टाँसेको अपिलसहितका रंगिन पोस्टर रातारात प्रहरीले हटाएको छ ।
मुख्यमन्त्री शङ्कर पोखरेल, प्रदेश सरकारका आन्तरिक मामिला तथा कानूनमन्त्री कुलप्रसाद केसी, नेपाल प्रहरी, सशस्त्र प्रहरीका प्रमुखलगायत सहभागी उक्त गोष्ठीमा गृहमन्त्री थापाले हिंसात्मक गतिविधि गरेर देशलाई फेरि पृथकतातर्फ धकेल्ने र अस्थिरता कायम गर्ने प्रयासलाई असफल तुल्याउन सरकार सफल भएको बताएका छन् ।
गृहमन्त्रालय र प्रदेश नंं ५, आन्तरिक मामिला तथा कानून मन्त्रालयद्वारा बुटवलमा आयोजित प्रदेशस्तरीय सुरक्षा गोष्ठीमा उनले मुलुकको शान्ति र स्थिरता सुदृढ बन्दै गएको तथा देशलाई अस्थिरता र विघटनतर्फ धकेल्ने कतिपय समस्याको मूलरुपमा समाधान गरिसकिएको बताए । गृहमन्त्री थापाले देशमा शान्ति सुव्यवस्था र आर्थिक प्रगतिको अवस्था सकारात्मक रुपमा अघि बढेको बताए ।
