बुधबार, कार्तिक ११ २०८३
बुधबार, कार्तिक ११ २०८३
आइतबार, असोज २५ २०८३
राष्ट्रिय विपद् जोखिम न्यूनीकरण तथा व्यवस्थापन प्राधिकरणले बाढीको जोखिमलाई ध्यानमा राख्दै गोरखा, धादिङ, तनहुँ हुँदै चितवनसम्मका नदी तटीय क्षेत्रमा उच्च सतर्कता अपनाउन आग्रह गरेको छ ।
गोरखाको चुमनुब्री गाउँपालिकास्थित लोक्पा र चुमलिङ क्षेत्रमा हिउँपहिरो खसेर नदी थुनिने र फुट्ने क्रमपछि बूढीगण्डकीमा लेदोसहितको भीषण बाढी आएको हो ।
प्राधिकरणका कार्यकारी प्रमुख डा. धर्मराज उप्रेतीले आइतबार सिंहदरबारस्थित कार्यालयमा जानकारी दिँदै बाढीले आरुघाट बजार क्षेत्र जलमग्न बनाउनुका साथै धादिङ जोड्ने पुल बगाएको पुष्टि गरे । उनका अनुसार बाढीले साहस ऊर्जा कम्पनीको तल्लो संरचनामा समेत क्षति पुर्याएको छ । त्यहाँ कार्यरत १८ जना प्राविधिक तथा कर्मचारीलाई सुरक्षित स्थानमा सारिएको छ ।
बाढी प्रभावित क्षेत्रमा नेपाली सेनाको हेलिकप्टरबाट हवाई निरीक्षण भइरहेको छ । उद्धार तथा राहत कार्यका लागि नेपाली सेना, नेपाल प्रहरी र सशस्त्र प्रहरी बल परिचालन गरिएको प्राधिकरणले जनाएको छ ।
मौसम प्रतिकूल भएकाले तत्काल हेलिकप्टर अवतरण गर्न नसकिए पनि जोखिममा रहेका नागरिकलाई सुरक्षित स्थानमा सार्ने काम भइरहेको प्रमुख उप्रेतीले बताए ।
उत्तरी गोरखाका सल्लेरी र जगत बजारमा केही घर तथा सवारीसाधन बगाएको प्रारम्भिक सूचना प्राप्त भएको छ । घटनाबाट भएको क्षतिको विस्तृत विवरण संकलन भइरहेको प्राधिकरणले जनाएको छ ।
समयमै पूर्वसूचना जारी गरिएकाले तल्लो तटीय क्षेत्रका बस्ती खाली गराउन सकिएको र हालसम्म मानवीय क्षति भएको विवरण प्राप्त नभएको प्राधिकरणको दाबी छ ।
प्राधिकरणले बेनिघाट, मलेखु तथा त्रिशूली नदीका तटीय क्षेत्र हुँदै चितवनसम्मका बजार र बस्तीलाई उच्च जोखिममा राख्दै स्थानीय बासिन्दालाई नदी किनार छाडेर सुरक्षित डाँडापाखातर्फ जान आग्रह गरेको छ ।
