आइतबार, कार्तिक १५ २०८३
आइतबार, कार्तिक १५ २०८३
बुधबार, साउन ६ २०८३
काठमाडौं । अख्तियार दुरुपयोग अनुसन्धान आयोगले नेपाल नागरिक उड्डयन प्राधिकरणका तत्कालीन महानिर्देशक प्रदीप अधिकारीसहित सम्बन्धित व्यक्तिविरुद्ध भ्रष्टाचार तथा सम्पत्ति शुद्धीकरणको आरोपमा विशेष अदालत काठमाडौंमा मुद्दा दायर गरेको छ।
आयोगका अनुसार अधिकारीले प्राधिकरणअन्तर्गतका विभिन्न ठेक्कापट्टामा स्वीकृति, अनुगमन, भुक्तानी तथा सहजीकरणको जिम्मेवारी सम्हाल्ने क्रममा पदको दुरुपयोग गर्दै ठेक्का प्राप्त कम्पनीहरूलाई अनुचित लाभ पुर्याएको र त्यसबापत एक करोड ७१ लाख रुपैयाँ घुस लिएको अनुसन्धानबाट खुलेको छ।
अनुसन्धानका क्रममा उक्त रकम गायत्री निर्माण सेवाका प्रमुख प्रेमप्रकाश ढकाललगायत व्यक्तिबाट प्राप्त भएको पाइएको आयोगले जनाएको छ। घुसस्वरूप प्राप्त रकम प्रयोग गरी अधिकारीले श्रीमतीको नाममा ललितपुर महानगरपालिका–५ मा जग्गा खरिद गरेको आरोप लगाइएको छ।
आयोगका अनुसार जग्गा खरिद गर्दा वास्तविक कारोबार रकम लुकाएर राजीनामा लिखतमा ९१ लाख रुपैयाँ मात्र उल्लेख गरिएको थियो। बाँकी रकम भने विभिन्न बैंक खातामार्फत कारोबार गरिएको देखाई अवैध रूपमा आर्जित रकमको स्रोत लुकाउने, रूपान्तरण गर्ने तथा वैध देखाउने प्रयास गरिएको अनुसन्धानबाट देखिएको छ।
अख्तियारले उक्त कार्य भ्रष्टाचार निवारण ऐन, २०५९ अन्तर्गत घुस/रिसवतसम्बन्धी कसुर र सम्पत्ति शुद्धीकरण (मनी लाउन्डरिङ) निवारण ऐन, २०६४ अन्तर्गतको कसुरसमेत भएको निष्कर्ष निकालेको छ।
यसै आधारमा पूर्व महानिर्देशक अधिकारीसहित संलग्न राष्ट्रसेवक तथा अन्य व्यक्तिविरुद्ध भ्रष्टाचार र सम्पत्ति शुद्धीकरणसम्बन्धी कसुरमा कानुनबमोजिम सजायको माग गर्दै मंगलबार विशेष अदालतमा आरोपपत्र दायर गरिएको आयोगले जनाएको छ।
