मंगलबार, साउन १२ २०८३
मंगलबार, साउन १२ २०८३
बुधबार, असार ३१ २०८३
काठमाडौं । फिफा विश्वकप २०२६ अन्तर्गत दोस्रो सेमिफाइनलमा आज (नेपाली समयअनुसार राति १२:४५ बजे) साविक विजेता अर्जेन्टिना र इंग्ल्यान्ड आमनेसामने हुँदैछन्। एटलान्टा स्टेडियममा हुने यस खेलको विजेताले फाइनलमा स्थान बनाउनेछ।
लियोनेल मेस्सीको कप्तानीमा रहेको अर्जेन्टिना लगातार उपाधि रक्षा गर्ने लक्ष्यमा छ भने ह्यारी केनको नेतृत्वमा रहेको इंग्ल्यान्ड लामो समयपछि विश्वकपको फाइनल पुग्ने दाउमा रहेको छ।
यो दुई टोलीबीच करिब दुई दशकपछि विश्वकपको सेमिफाइनलमा हुने भेट हो। विश्वकप इतिहासमा उनीहरू यसअघि पाँच पटक आमनेसामने भएका छन्। तीमध्ये इंग्ल्यान्डले तीन खेल जितेको छ भने अर्जेन्टिनाले पेनाल्टीबाट निर्णय भएको एक खेलसहित दुई खेल आफ्नो पक्षमा पारेको छ।
अर्जेन्टिना–इंग्ल्यान्ड प्रतिस्पर्धा विश्वकपकै सबैभन्दा चर्चित प्रतिद्वन्द्वितामध्ये एक मानिन्छ।
दुवै टोली पहिलोपटक सन् १९६२ को विश्वकपमा भिडेका थिए। त्यसपछि १९६६ को क्वार्टरफाइनलमा अर्जेन्टिनी कप्तान एन्टोनियो राटिनलाई रेड कार्ड देखाइएपछि खेल निकै विवादित बनेको थियो, जहाँ इंग्ल्यान्डले १–० को जित निकालेको थियो।
सन् १९८६ को विश्वकपमा डिएगो म्याराडोनाको चर्चित ‘ह्यान्ड अफ गड’ गोल र उत्कृष्ट एकल गोलले अर्जेन्टिनालाई ऐतिहासिक जित दिलाएको थियो। त्यस विश्वकपमा अर्जेन्टिनाले उपाधि पनि जितेको थियो।
त्यसपछि १९९८ को विश्वकपमा डेभिड बेकह्यामको रेड कार्ड अर्को चर्चित घटना बन्यो भने २००२ मा बेकह्यामले पेनाल्टीमार्फत निर्णायक गोल गर्दै इंग्ल्यान्डलाई जित दिलाएका थिए।
अब फेरि एकपटक विश्वकपको ठूलो मञ्चमा यी दुई ऐतिहासिक प्रतिद्वन्द्वी फाइनल प्रवेशका लागि आमनेसामने हुन लागेका छन्।
