जेन–जी आन्दोलन अमेरिकाद्वारा सञ्चालित : मोहनविक्रम सिंह

काठमाडौं । अग्रज नेता मोहनविक्रम सिंहले जेन–जी आन्दोलन अमेरिकाद्वारा सञ्चालित रहेको दाबी गरेका छन्।

शनिबार जेन–जी आन्दोलनबारे काठमाडौंमा आयोजित छलफल कार्यक्रममा बोल्दै उनले हालको सरकारसमेत त्यसै आन्दोलनको परिणाम भएको तर आन्दोलनको मूल नियन्त्रण अमेरिकासँग सम्बन्धित समूहले गरेको आरोप लगाए।

सिंहका अनुसार अमेरिकासँग जोडिएका व्यक्तिहरू, बार्बरा फाउन्डेशन तथा एनजिओ–आइएनजिओसँग आबद्ध समूहहरु सरकार बनाउने प्रक्रियामा सक्रिय देखिएका छन्। पछिल्ला गतिविधिहरुले उनीहरूको वास्तविक चरित्र उजागर भएको समेत उनले बताए।

उनले भने, “यो सरकार मूलतः जेन–जी आन्दोलनको परिणाम हो। तर जेन–जी आन्दोलन अमेरिकाद्वारा नै सञ्चालित छ। त्यसका मान्छेहरू बार्बरा फाउन्डेशन र एनजिओ–आइएनजिओसँग सम्बन्धित छन्। विभिन्न गतिविधिहरुले उनीहरूको चरित्रलाई उदांगो बनाएको छ।”

सिंहले आरोप लगाए अनुसार, जेन–जी आन्दोलनलाई गलत तत्वहरूले बीचमै ‘हाइज्याक’ गरेका कारण यसको वास्तविक स्वरूप देखिन नरहेको छ। “जेन–जी आन्दोलनभित्र गलत तत्वहरूको प्रयोग भयो, हाइज्याक गरियो, अहिले देखिँदै गर्ने मूल आन्दोलन जेन–जी होइन,” उनले स्पष्ट पारे।

सिंहले कुनै पनि देशको राजनीतिमा निर्णायक भूमिका राजनीतिक दलहरूले नै खेल्नुपर्ने उल्लेख गर्दै दलहरूको जिम्मेवारी अझ बढी बढेको बताएका छन्।