बुधबार, साउन १३ २०८३
बुधबार, साउन १३ २०८३
२२ भदौ, काठमाडौं–भारतीय व्यवसायी रामनिरञ्जन जटियाको ७० करोड रुपैयाँ सम्पत्ति भएको कम्पनी उनलाई थाहै नदिई बिक्री गर्ने कम्पनी रजिस्ट्रार कार्यालयका दुई कर्मचारी फरार भएका छन् । प्रहरीले अनुसन्धान सुरु गरेलगत्तै गंगाधर पौडेल र धर्मराज रोकाय फरार भएका हुन् । नयाँ पत्रिका दैनिकले समाचार छापेको छ ।
उनीहरूले नक्कली कागजपत्रका आधारमा जटियाको शंकर इलेक्ट्रोनिक्स कम्पनीको सेयर जितबहादुर मगरको नाममा नामसारी गरिदिएका थिए । कम्पनीको विशेष साधारणसभामार्फत जटियाको कम्पनीको सेयर आफूले किनेको कागजपत्र पेस गरे । कम्पनीमा एक मात्र सञ्चालक राख्ने भएको नक्कली निर्णयको पत्रसमेत पेस गरे । त्यसपछि जग्गा बिक्री प्रक्रिया अघि बढेको हो ।
कम्पनी आफ्नो नाममा ल्याई जग्गा बिक्रीको प्रक्रिया अघि बढाउँदा जटियाले थाहा पाएपछि जितबहादुर फरार भएका थिए । केन्द्रीय अनुसन्धान ब्युरो (सिआइबी)ले उनलाई पक्राउ गरी अनुसन्धान गर्दा कर्मचारीकै मिलेमतो खुलेको हो । कम्पनी रजिस्ट्रार कार्यालयका दुई अधिकृतसहित चारजना पक्राउ परिसकेका छन् ।
सिआइबीका एसपी सानुराम भट्टराईका अनुसार जितबहादुर जटियाकै पूर्वकर्मचारी हुन् । आफू विदेशमा भएका वेला घरको गहना चोरी गरेको आरोपमा उनलाई केही महिनाअघि हटाएका थिए । तर, उनको कम्पनीका कतिपय कागजपत्र मगरसँगै थियो ।
सो कुरा थाहा पाएपछि उनका साथीहरू राजन लम्साल र नीरज मानन्धरले नक्कली कागजपत्र बनाएर जग्गा बिक्री गर्ने योजना सुनाएका थिए । सोहीअनुसार जितबहादुरले कानुन व्यवसायी पुण्यप्रसाद खरेलसँग छलफल गरेर उनीमार्फत नै कम्पनी रजिस्ट्रारको कार्यालयमा सेटिङ मिलाई प्रक्रिया अघि बढाएका थिए ।
योजनाअनुसार २९ र ३२ असारमा कम्पनी रजिस्ट्रारको कार्यालयबाट जटियाको कम्पनी जितबहादुरकोे नाममा दर्ता भएको थियो । जटिया सामान्य सञ्चालक मात्र भए । कम्पनीको नाममा सतुंगलमा १५ रोपनी जग्गा छ । सो जग्गा बेच्न उनले जापानमा व्यवसाय गर्ने प्रेमसागर सापकोटासँग प्रतिआना १० लाख २५ हजारका दरले डिल पनि गरे । दुई करोड रुपैयाँ बैनासमेत लिइसकेका थिए ।
जटियाको बालुवाटरको तीन रोपनी जग्गामध्ये १४ आना एक पैसा तीन दाम जग्गा प्रतिआना २५ लाख रुपैयाँका दरले बेच्नका लागि राजभाइ श्रेष्ठसँग एक करोड बैना लिए । आफ्नो जग्गा नापजाँच भएको थाहा पाएपछि उनले प्रहरीमा उजुरी दिएका हुन् । जग्गा किन्न खोज्ने सापकोटा र श्रेष्ठ पनि प्रकरणमा ठगिएका छन् ।
प्रहरीले सो प्रकरणमा अधिवक्ता पुण्यप्रसाद खरेललाई समेत पक्राउ गरेको छ । जसको मुख्य योजनाकार जितबहादुर तथा साथीहरू राजन र नीरज भएको एसपी भट्टराईले बताए । उनीहरूलाई सहयोग गर्ने राजकुमार तामाङ, चिरीबाबु महर्जन, हिमाल महर्जन र अमृत थापामगरलाई पनि प्रहरीले पक्राउ गरेको छ ।
वैदेशिक लगानी रहेको कम्पनीको सेयर हस्तान्तरण उद्योग विभागको सहमतिमा मात्र हुने प्रावधान छ । उद्योग विभागको सहमतिविना नै कर्मचारीले कम्पनी नामसारी गरेपछि मिलेमतो प्रस्ट भएको अनुसन्धानमा आबद्ध प्रहरी अधिकारी बताउँछन् ।
पक्राउ परेकाहरूविरुद्ध प्रहरीले ठगी, चोरी, साइबर क्राइम र संगठित अपराध मुद्दामा मुद्दा चलाउन सरकारी वकिल कार्यालयमा फाइल पेस गरेको छ । पक्राउ परेका कम्पनी रजिस्ट्रार कार्यालयको आइटी शाखाका दुई कर्मचारीले भने आफूहरूलाई त्यस विषयमा कुनै जानकारी नभएको र फसाइएको गुनासो गरेका छन् ।
नक्कली कागजपत्रका आधारमा कम्पनीको नामसारी हुन थालेपछि उद्योग, वाणिज्य तथा आपूर्ति मन्त्रालयले यसमा कडाइ थालेको छ । उद्योगमन्त्री मातृकाप्रसाद यादवले सम्बन्धित धनीको उपस्थितिविना सेयर हस्तान्तरणको निर्णय नगर्न कम्पनी रजिस्ट्रारको कार्यालयलाई निर्देशन दिएको बिहीबार राजधानीमा आयोजित एक कार्यक्रममा बताए ।
