शुक्रबार, कार्तिक २० २०८३
शुक्रबार, कार्तिक २० २०८३
काठमाडौं । गृहमन्त्री बालकृष्ण खाँणले संविधान देशको गतिशील दस्तावेज रहेको बताएका छन् ।
सोमबार बसेको राष्ट्रिय सभा बैठकमा नेपाल नागरिकता (पहिलो संशोधन) विधेयक २०७९ माथिको छलफलमा उठेका प्रश्नको जवाफ दिँदै उनले संविधान गतिशील दस्तावेज भएकाले आवश्यकताअनुसार संशोधन गर्दै जानुपर्ने बताए ।
‘संविधान देशको गतिशील दस्तावेज हो, धार्मिक ग्रन्थ होइन । यसर्थ आवश्यकताअनुसार संशोधन गर्दै जानुपर्छ,’ उनले भने, ‘नागरिकता प्राप्त गर्न खुकुलो बनाएको होइन । नागरिकताविहीन नागरिकलाई नागरिकता प्रदान गर्न विधेयक ल्याएको हो ।’
सर्वसम्मत रूपमा विधेयक पास गर्न आग्रह गरेका उनले अघिल्लो सरकारले ल्याएको विधेयक र अध्यादेशकै आधारशिलामा रहेर अहिले विधेयक ल्याएको बताए ।
विधेयकमा केही कमीकमजोरी भए पछि संशोधन गर्दै जानुपर्ने बताएका गृहमन्त्री खाँणले उक्त विधेयक अहिले पारित गरेर नागरिकताविहीन नागरिकको संख्या घटाउनुपर्नेमा जोड दिए ।
गृहमन्त्री खाँडले नेपालका रहेका सम्पूर्ण दल राष्ट्रवादी भएको बताउँदै कसैले यसमा शंका गर्नुपर्ने ठाउँ नरहेको बताए ।
नेपालमा बसोवास गरेर नेपाली भूमि रक्षा गर्ने नेपाली जनता रहेको उनले बताए । उनले उत्तरी सीमा र दक्षिणका सीमा बन्ने नेपालीले देशको सीमा रक्षा गरेको समेत बताए ।
