शनिबार, कार्तिक २१ २०८३
शनिबार, कार्तिक २१ २०८३
चितवन । कांग्रेस नेता एवं गृहमन्त्री बालकृष्ण खाँणले भरतपुर महानगरपालिकाको मेयरमा स्वतन्त्र उम्मेदवारी दिएका कांग्रेस नेता जगन्नाथ पौडेललाई उम्मेदवारी फिर्ता लिन गरेको आग्रह पौडेलले अस्वीकार गरेका छन् ।
गृहमन्त्री खाँणसँगको भेटमा पौडेलले उम्मेदवारी फिर्ता लिन खाँणले गरेको आग्रह अस्वीकार गरेका हुन् ।
पौडेललाई भेट्न गृहमन्त्री खाँण भरतपुर ७ स्थित पौडेल निवास नै पुगेका थिए । गृहमन्त्रीसँगको भेटमा आफूले उम्मेदवारी फिर्ता लिन नसक्ने कुरा स्पष्ट रूपमा बताएको पौडेलले बताए । आफूले दिएको उमेदवारी चितवनवासीको लोकतन्त्र र आफ्नो पार्टीलाई बचाउनका लागि सञ्चालन गरेको अभियानसँग मात्रै सम्बन्धित रहेको भन्दै उनले केन्द्रीय गठबन्धनसँग सम्बन्धित नरहेको बताए ।
‘मेरो कारणले केन्द्रीय गठबन्धनलाई गाह्रो पर्नुपर्ने केही छैन’, उनले भने, ‘परिस्थिति धेरै अगाडि बढिसकेको छ । मैले एउटा सामान्य नागरिकका हिसाबले उम्मेदवारी दिए । तपाईहरूले पनि सामान्य कार्यकर्ताले स्वतन्त्र उम्मेदवारी दिएछ भनेर बुझ्नुस् भनेँ,भने ।’
पार्टीको अनुशासनविपरीत काम गरेको जस्तो लागे कारबाही गर्न पनि भनेको उनले बताए । पहिलो भेटमा पौडेलले उम्मेदवारी फिर्ता नलिने बताएपछि फेरि भेट्ने भनेर गृहमन्त्री निस्किएका छन् ।
पौडेललाई भेट्नुअघि गृहमन्त्री खाँणले कांग्रेसका पूर्व जिल्ला सभापति रहेको पुराना नेता कृष्णलाल सापकोटा र महासमिति सदस्य मिना खरेललाई समेत भेटेर पौडेलको उम्मेदवारी फिर्ताका विषयमा कुरा राखेका थिए । सापकोटा र खरेलले पनि उम्मेदवारी फिर्ता गराउन सहयोग गर्न गरेको खाँणको आग्रह अस्वीकार गरेका छन् ।
खाँणले भने पौडेलसँग पुनः छलफल हुने भन्दै उम्मेदवारी फिर्ता लिने विश्वास व्यक्त गरे ।
गठबन्धनबाट भरतपुरको मेयरको उम्मेदवारमा माओवादी केन्द्रकी रेणु दाहाललाई उठाउने निश्चित भएपछि पौडेलले बागी उम्मेदवारी दिएका थिए ।
