शनिबार, कार्तिक २१ २०८३
शनिबार, कार्तिक २१ २०८३
सशस्त्र प्रहरी बलको ११ नम्बर गण, गौरका घुमुवाले संगठनकै बदनाम हुने गरी व्यापारी तर्साउने काम गरेपछि त्यस्तो कामको जानकारी गराउन व्यापारीहरु अघि सरेका छन् । अनलाइन बिल भएको सामानमा समेत व्यापारीले थप रकम नदिए सशस्त्रले भन्सार चलान गर्न थालेपछि व्यापारीहरु उग्र भएका हुन् ।
अपराध नियन्त्रण र सूचना संकलनका लागि खटिएका सशस्त्रका घुमुवा प्रहरी नै द्रव्य संकलनमा लागेको आरोप छ । माथिल्लो निकायका हाकिमकै निर्देशनमा रौतहटको गौरमा घुमुवा रवि मिश्र र उमेश पण्डितको अवैध असुली तीब्र भएको व्यापारीहरु बताउँछन् ।
हिजो बिहान ११ बजेको समयमा सशस्त्र प्रहरीका घुमुवा मिश्र र पण्डितले बिर्ताका व्यपारीसँग ३० हजार रुपैयाँ मागेका थिए । व्यापारीले आफूले भन्सार तिरेर ल्याएको सामानको अनलाइन बिल साथमा रहेको जानकारी गराउँदा गराउँदै पनि भने जति रकम नदिएको झोँकमा उनीहरुले ती व्यापारीको सामान पुनः भन्सार चलान गरिदिएको गुनासो छ ।
सशस्त्रका घुमुवाले बिर्ताका व्यापारी अम्रेन्द्रकुमार जयसवालको सामान भन्सार चलान गरेका हुन् । मिश्र र पण्डितले व्यापारी जयसवालसँग पैसा नदिए अनलाइन बिल भए पनि केही नलाग्ने भन्दै धम्काएका थिए । उक्त धम्कीको अडियो जनआस्थाले समेत फेला पारेको छ ।
व्यापारी जयसवाललाई सामान लिएर आउँदै गर्दा घुमुवा मिश्रले पहिले पैसा बुझाउन र त्यसपछि मात्र सामान लैजान भन्दै हकारेको सुनिन्छ । त्यसबखत उनले ३० हजार रुपैयाँ मागेका थिए । घुमुवालाई अवैध रकम नदिई गाडीमा समान लिएर हिँडेका जयसवाललाई सामानसहित हिजो नजिकैको नहरबाट पक्राउ गरी उनीहरुले भन्सार चलान गरिदिएका हुन् ।
रौतहटको सिमानामा सशस्त्र प्रहरीका घुमुवा मिश्र र पण्डितको दादागिरीका कारण आफूहरु हैरान बनेको व्यापारीहरु बताउँछन् । नेपाल प्रहरीका घुमुवाले पत्रकारको मोटरसाइकलमा लागुऔषध राखेर फसाएको घटना सेलाउन नपाउँदै सशस्त्र प्रहरीका घुमुवाको हर्कत बाहिरिएको हो ।
रौतहटका व्यापारी आफूहरुलाई कुन केसमा कसरी र कहिले फसाइदिन सक्ने भन्ने त्रासमा रहेको बताइन्छ । अपराध नियन्त्रणको निम्ति सूचना संकलन गर्न सशस्त्र प्रहरीले परिचालन गरेका घुमुवा प्रहरीले अवैध रकम नदिएको झोँकमा व्यापारीको सामान भन्सार पठाउने काम गर्न थालिएको व्यापारीहरुको आरोप छ । ४५ हजार ९ सय ९१ रुपैयाँको २ बोरा पतञ्जली बिस्कुट, सेम्पु ३ कार्टुन, पार्ले क्रिम बिस्कुट ५ कार्टुन ल्याएका जयसवाललाई घुमुवाले ३० हजार घुस नदिएको झोँकमा भन्सार चलान गरेका हुन् । जनआस्था साप्ताहिकमा खबर छ l
