शनिबार, कार्तिक २१ २०८३
शनिबार, कार्तिक २१ २०८३
काठमाडौं । नेकपा एमालेले दशौँ राष्ट्रिय महाधिवेशनमा सात करोड ५० लाख रुपैँया खर्च हुने अनुमान गरेको छ ।
चितवनमा आगामी साता हुने महाधिवेशनका लागि साढे ७ करोड लाग्ने सो पार्टीको आकलन छ ।
महाधिवेशनका लागि गठित मूल व्यवस्थापन समितिअन्तर्गतको आर्थिक समितिका संयोजक विष्णु रिमालले केन्द्रीय कमिटीको दायित्वमा त्यति रकम आवश्यक पर्ने बताए ।
महाधिवेशनको बन्दसत्र सौराहाको सेभेन स्टार होटलमा हुँदैछ । सो होटलमा एक हजार बढी प्रतिनिधिका लागि बासको व्यवस्था गरिएको छ । महाधिवेशनमा १ हजार ९ सय ९९ प्रतिनिधि सहभागी हुनेछन् । थप ५ प्रतिशत मनोनित हुँदा महाधिवेशनमा भाग लिने प्रतिनिधि झण्डै २२ सय पुग्ने छन् ।
प्रतिनिधिको खानपान र बासका लागि एमालेलाई ७ करोड बढी पैसा चाहिने भएको छ । यसको जोहो एमालेले आफ्ना हरेक सदस्यलाई एक सय रुपैयाँ पार्टीको बैंक खातामा जम्मा गर्न भनेको छ ।
यसअघि रकम नै तोकेर रसिद काट्दै आएको एमालेले यसपाली भने न्यूनतम रुपैँया पार्टीको खातामा जम्मा गर्न आग्रह गरेको छ ।
एमालेमा पछिल्लो पटक नवीकरण भएका पार्टी सदस्यको सङ्ख्या ८ लाख ५५ हजार ४ सय ५३ पुगेको एमालेको दाबी छ ।
अघिल्लो महाधिवेशनमा दुई करोड २५ लाख खर्च भएको थियो भने गत असोजमा गोदाबारीमा भएको विधान अधिवेशनमा ५ करोड खर्च भएको थियो ।
