आइतबार, कार्तिक १५ २०८३
आइतबार, कार्तिक १५ २०८३
‘बस्न पाएँ भन्दैमा थ्याच्च नबस्नु, बोल्न पाएँ भन्दैमा प्याच्च नबोल्नु’ भन्ने उखानलाई बिर्सेर जनतामाझ कचहरी बस्न गएपछि उर्जामन्त्री टोपबहादुर रायमाझी लखेटिएका छन् ।
‘यो लाइन प्राविधिकलगायत सबै कुराले राम्रो रहेछ । यो लाइन सर्दैन । म तपाईंहरुलाई अरु जस्तो ललिपप ख्वाउन आएको होइन । तपाईंहरुले बिरोध,बाधा नगर्दिनुस् । नभए राज्यले शक्ति प्रयोग गर्न पनि पछि पर्दैन’ भनेपछि भेलामा उपस्थित सरोकारवालाले मन्त्री विरुद्ध होहल्ला शुरु गरे ।
होहल्ला शुरु भएपछि कटारी नगरपालिका प्रमुख ज्ञानेन्द्र श्रेष्ठ र उदयपुर प्रहरी प्रमुख भीमप्रसाद दाहाललगायतले मन्त्रीलाई सुरक्षितरुपमा भीडबाट निकाले । होहल्लासँगै भीड बढ्दै गएपछि मन्त्री रायमाझी लामो फड्को मार्दै सुरक्षा घेराबीच अघि बढे तर हुलले पछ्याइ रह्यो ।
उनी फागुन १० गते कटारी नगरपालिकाका मेयर ज्ञानेन्द्र श्रेष्ठको नेतृत्वमा गएको सोलु कोरिडर १३२ केभी प्रसारण लाइन आयोजनाबाट पीडितहरुको मर्का सुन्न कटारी आएका थिए ।
तर,पीडितहरुमाझ बसेर ठालू पल्टँदैं शक्तिको प्रयोग गर्ने कुरा गरेपछि माथिको उखान चरितार्थ हुन पुगेको हो ।
मन्त्री रायमाझीलाई जनतामाझ साइजमा ल्याउनको लागि नेपाली काँग्रेसका क्षेत्रीय सभापति रामकुमार खत्री र नगर सभापति गोपी पराजुली,माओवादी केन्द्रका केपी बराल,व्यवसायी कृष्ण थापा र समाजसेवी डाकबहादुर थापाले हुलको नेतृत्व गरेको बताइन्छ ।
उक्त आयोजनाले सन् २०१६ सेप्टेम्बरमा काम शुरु गरे यता विभिन्न कारण जनाउँदै पाँच पटक काम सक्ने म्याद थपिसकेको छ । अन्य क्षेत्रको काम सहजरुपमा सम्पन्न भए पनि कटारी मरुवा क्षेत्रभित्र करिब ४ किलोमिटर प्रसारण लाइनभित्र पर्ने जग्गाधनीहरुले अवरोध सिर्जना गर्दै आएका छन् ।
पीडितहरुको प्रसारण लाइन क्षेत्रभित्र पर्ने नम्बरी तथा ऐलानी जग्गाको उचित क्षतिपूर्ति पाउनुपर्ने माग छ । एक जानकारका अनुसार सो क्षेत्रमा करिब एक करोड रुपैयाँ बराबरको मुआब्जा दिनुपर्ने आँकलन गरिएको विज्ञहरुले गरेका छन् ।
अस्तिको घटनापछि अवरुद्ध आयोजनाको कामलाई कसरी सम्पन्न गर्ने भन्ने चिन्ता थपिएको आयोजना प्रमुख जनार्दन शर्माले बताए । उनले अवरोध नहुने हो भने आउँदो अढाई महिनाभित्र काम सम्पन्न हुने दाबी गरेका छन् ।
मन्त्रीलाई धपाएपछि आयोजना कसरी सम्पन्न गर्ने भनेर चिन्ता बढेको छ । ‘पीडित जनताले मन्त्री रायमाझीविरुद्ध हुलहुज्जत गरेको’ प्रत्यक्षदर्शी एकजना जनप्रतिनिधिले समेत हो भनेका छन् ।
त्यतिबेला मन्त्रीकै शैलीमा आयोजना प्रमुखले पनि अलाइन्मेन्ट फेर्न सकिँदैन भनेर ठाडो जवाफ दिएपछि सबै क्रुद्ध भएका हुन् । जन आश्था साप्ताहिकमा खबर छ ।
