आइतबार, कार्तिक १५ २०८३
आइतबार, कार्तिक १५ २०८३
प्रधानमन्त्री केपी शर्मा ओलीले गएको पुस पाँच गते संसद विघटन गरेसँगै देशभर ओलिको विरोधमा आन्दोलन भयो। प्रधानमन्त्रीको कदम जनताका लागि सही नहुने भन्दै विभिन्न दल, पार्टीले प्रदर्शन गरे। प्रधानमन्त्रीले आफूलाई काम गर्न नदिएको भन्दै संसद भंग गरेका थिए, तर संसद विघटनलाई सर्वोच्च अदालतले असंवैधानिक भएको भन्दै बदर गर्यो। यसो गर्दा अब प्रधानमन्त्रीले राजीनामा दिनुपर्ने भन्दै विभाजित बनेको प्रचण्ड – माधव समुहले प्रधानमन्त्रीको राजीनामा मागे तर प्रधानमन्त्रीले राजीनामा दिने विचारमा नभएको देखिएकाे छ। ओलीले किन राजीनामा दिएनन् त? यो अहिले धेरैको मनमा प्रश्न गुन्जिरहेको छ ।
हिमालय टेलिभिजनको कार्यक्रम ‘यक्ष प्रश्न’मा गरिएको कुराकानी,,,
प्रधानमन्त्री ओलीले आफूलाई सर्वोच्चले प्रधानमन्त्रीबाट राजीनामा देउ नभनेको ओलिको दाबी रहेको छ।
सर्वोच्चको फैसलाले संवैधानिक हार त भयो नि भन्ने प्रश्नमा उनले प्रतिप्रश्न गरे, ‘के मा हरायो ? राजीनामा देउ भन्यो ? अदालतले यस्तो अवस्थामा राजीनामा दिनुपर्छ भन्यो ?’
प्रतिनिधिसभा (संसद) विघटन गरेर गल्ती गरेछु भन्ने लाग्या छ ? भन्ने प्रश्नमा ओली समूहका अध्यक्ष समेत रहेका प्रधानमन्त्री ओलीले भने, ‘मैले गरेको निर्णयले यो स्थिति होइन, देश चुनावतिर जान्थ्यो । समस्याको समाधान हुनेतिर जान्थ्यो ।’
‘राजीनामा पत्र खल्तीमै छ ? भन्ने प्रश्नमा प्रधानमन्त्री ओली ‘राजीनामा अं भन्दै केहीबेर रोकिए । उनले अघि भने, ‘पत्र चाहीँ म लेख्दिनँ । मैले लेख्नुपर्ने अवस्था होइन, छैन ।’
आफूले आवश्यक परे विश्वासको मत लिने लगायतका बाटो समाउन सक्ने प्रधानमन्त्री ओलीले बताए । ‘…मैले अरु बाटा समाउनसक्छु । आवश्यक परे विश्वासको मत लिन सक्छु । विश्वासको मतमा मलाई हराउन पर्यो नि’ ओलीले भने, ‘विश्वासको मत पनि लिइन भने अर्को पनि मेरो बाटो हुनसक्छ ।’
‘संकटकाल लगाउनुहुन्छ ?’ भनेर प्रश्नमा प्रधानमन्त्री ओलीले हाँस्दै भने, ‘अर्को पनि बाटो छ, अविश्वासको प्रस्ताव पारित गरेर मलाई हटाउने संसदीय र संवैधानिक बाटो छ ।’ अहिले पनि आफू संसदमा ६४ प्रतिशतको प्रधानमन्त्री भएको भन्दै उनले अविश्वास प्रस्ताव पारित गरेर देखाउन चुनौती दिए ।
२३ गते संसद बैठक बस्ने र अविश्वासको प्रस्ताव आए त्यसलाई पराजित गर्ने दाबी गरे । त्यसका लागि कांग्रेस र जसपाको साथ पाउने प्रधानमन्त्री ओलीको दाबी छ । उनले भने, ‘कांग्रेस र मधेसवादी दलले राजनीति गरेको, पार्टी खोलेको कुनै अमुक महत्वकांक्षी व्यक्तिलाई प्रधानमन्त्री बनाउन हो ?’
कांग्रेस सभापति शेरबहादुर देउवासँग राम्रो मित्रता छ नि भन्ने प्रश्नमा उनले भने, लोकतन्त्रका लागि लड्ने आफूहरुको पुरानै समझदारी रहेको साथै पछिल्लो सन्दर्भमा भने कुनै सहमति नभएको ओलीले बताए।
