भिडियो भाइरल बनेपछि नारायणकाजीले मुख खोले

काठमाडौं। नेकपा (प्रचण्ड–माधव) समूहले शुक्रबार राजधानीमा आयोजना गरेको विरोध प्रदर्शन र विरोधसभामा मञ्चमा रहेका केन्द्रीय संघर्ष समितिका संयोजक नारायणकाजी श्रेष्ठ र अध्यक्ष माधवकुमार नेपालबीच ‘भनाभन’ भयो। यो भनाभनको भिडियो शनिबार भाइरल नै बनेको छ। उनीहरुबीच के कुरामा विवाद भएको स्पष्ट नभइरहेका बेला श्रेष्ठले यो विषयमा मुख खोलेका छन्।

उनले सामाजिक सञ्जालमा एक स्टाटस लेख्दै आन्दोलन संघर्ष समितिलाई जानकारी नै नदिएर कार्यक्रम परिवर्तन गरिएकाले आफूले कुरा उठाएको उल्लेख गरेका छ। उनले भनेका छन्, ‘हाम्रो हिजोको कार्यक्रमको क्रममा मञ्चमा देखिएको विवाद यही बिषयमा हो। जुलुस परिक्रमा र सभा शुरु गर्ने सम्बन्धमा केन्द्रीय संघर्ष समितिले बनाएको पूर्वनिर्धारित योजना संघर्ष समितिको जानाकारी बिना नै अकस्मात परिवर्तन गरियो। त्यसो गरिनु हुँदैनथियो। संस्थागत कार्य प्रणालीको वारेमा सबै नेतृत्वदायी कमरेडहरुको गंभीर ध्यानाकर्षणका लागि त्यतिबेलानै जोडले कुरा उठाउनु जरुरी थियो।’