आइतबार, कार्तिक १५ २०८३
आइतबार, कार्तिक १५ २०८३
आइतबार, कार्तिक १५ २०८३
नेपाल इन्भेष्टमेन्ट मेगा बैंक लिमिटेडले चालु आर्थिक वर्ष २०८३/८४ को पहिलो त्रैमासमा खुद नाफामा असाधारण वृद्धि गरेको छ । बैंकले सार्वजनिक गरेको चालु आवको साउनदेखि असोज मसान्तसम्मको वित्तीय विवरणअनुसार गत वर्षको सोही अवधिको तुलनामा खुद नाफा २५ सय २२ प्रतिशतले बढेर १ अर्ब १८ करोड १४ लाख २१ हजार रुपैयाँ पुगेको हो ।
गत आर्थिक वर्ष २०८२/८३ को पहिलो त्रैमासमा बैंकले जम्मा ४ करोड ५० लाख ५० हजार रुपैयाँ खुद नाफा आर्जन गरेको थियो। अघिल्लो वर्षको तुलनामा यस वर्ष नाफामा भएको ठूलो वृद्धिले बैंकको वित्तीय कार्यसम्पादनमा उल्लेख्य सुधार देखाएको छ । समीक्षा अवधिमा बैंकको खुद ब्याज आम्दानीमा भने सामान्य वृद्धि भएको छ । गत वर्षको पहिलो त्रैमासमा ३ अर्ब २४ करोड ३१ लाख २५ हजार रुपैयाँ रहेको खुद ब्याज आम्दानी चालु आवको सोही अवधिमा बढेर ३ अर्ब २७ करोड १६ लाख ८५ हजार रुपैयाँ पुगेको छ । त्यस्तै, बैंकले समीक्षा अवधिमा ५९ करोड २१ लाख १४ हजार रुपैयाँ खुद शुल्क तथा कमिसन आम्दानी गरेको छ । बैंकको कुल सञ्चालन आम्दानी ४ अर्ब ३४ करोड ९४ लाख ७९ हजार रुपैयाँ पुगेको छ भने सञ्चालन नाफा १ अर्ब ६९ करोड ७ लाख ५ हजार रुपैयाँ रहेको छ ।
तर, खुद नाफामा उल्लेख्य सुधार देखिए पनि बैंकको वितरणयोग्य नाफा भने अझै ठूलो परिमाणमा ऋणात्मक छ । अघिल्ला वर्षहरूको सञ्चित नोक्सानीका कारण बैंकको वितरणयोग्य नाफा ५ अर्ब १६ करोड १६ लाख ३० हजार रुपैयाँ ऋणात्मक रहेको वित्तीय विवरणले देखाएको छ । यसले तत्काल लाभांश वितरण गर्न सक्ने अवस्थामा बैंक नरहेको संकेत गर्छ ।
बैंकको निक्षेप सङ्कलनमा वृद्धि भए पनि कर्जा विस्तार भने अपेक्षाकृत सुस्त देखिएको छ । चालु आवको असोज मसान्तसम्म बैंकको कुल निक्षेप १०.७५ प्रतिशतले बढेर ५ खर्ब ४० अर्ब ७९ करोड ६९ लाख रुपैयाँ पुगेको छ । गत वर्षको सोही अवधिमा बैंकसँग ५ खर्ब २६ अर्ब ६३ करोड २० लाख रुपैयाँ निक्षेप रहेको थियो ।
यसैगरी, बैंकको कर्जा प्रवाह ०.३३ प्रतिशतले मात्र बढेर ३ खर्ब २२ अर्ब ४१ करोड १२ लाख रुपैयाँ पुगेको छ । निक्षेपको तुलनामा कर्जा विस्तार न्यून रहेकाले बैंकको निक्षेप तथा कर्जा अनुपात (सीडी रेसियो) ६६.७३ प्रतिशतमा सीमित भएको छ ।
