मुक्तिनाथ विकास बैंकको नाफा ४३ प्रतिशतले बढ्यो

मुक्तिनाथ विकास बैंक लिमिटेडले चालु आर्थिक वर्ष २०८३/०८४ को पहिलो त्रैमासमा खुद नाफा उल्लेख्य रूपमा वृद्धि गरेको छ । बैंकले सार्वजनिक गरेको वित्तीय विवरणअनुसार साउनदेखि असोजसम्मको तीन महिनामा बैंकको खुद नाफा ४३.४४ प्रतिशतले बढेर ३२ करोड २४ लाख रुपैयाँ पुगेको हो । गत आर्थिक वर्षको सोही अवधिमा बैंकले २२ करोड ४७ लाख रुपैयाँ खुद नाफा कमाएको थियो ।

बैंकको नाफामा आएको सुधारको प्रमुख आधार कर्जा नोक्सानी व्यवस्था (इम्पेयरमेन्ट चार्ज) मा भएको भारी गिरावट र फि तथा कमिसन आम्दानीमा भएको उल्लेख्य वृद्धि देखिएको छ । समीक्षा अवधिमा बैंकको इम्पेयरमेन्ट चार्ज ७४.९७ प्रतिशतले घटेर १३ करोड ५४ लाख रुपैयाँमा सीमित भएको छ । गत वर्षको सोही अवधिमा यस्तो रकम ५४ करोड ११ लाख रुपैयाँ रहेको थियो । कर्जा नोक्सानी व्यवस्थाका लागि छुट्याउनुपर्ने रकममा आएको गिरावटसँगै बैंकको सञ्चालन मुनाफा १३५.५४ प्रतिशतले उकालो लागेर ७५ करोड ६३ लाख रुपैयाँ पुगेको छ । यसले बैंकको नाफा वृद्धिमा इम्पेयरमेन्ट चार्ज घट्नुको ठूलो भूमिका रहेको देखाउँछ ।

बैंकको खुद ब्याज आम्दानी भने अपेक्षाकृत सामान्य दरमा बढेको छ । समीक्षा अवधिमा यस्तो आम्दानी २.७१ प्रतिशतले वृद्धि भई १ अर्ब २१ करोड ७६ लाख रुपैयाँ पुगेको छ । गत वर्षको पहिलो त्रैमासमा बैंकले १ अर्ब १८ करोड ५५ लाख रुपैयाँ खुद ब्याज आम्दानी गरेको थियो ।

यसैगरी, खुद फि तथा कमिसन आम्दानीमा भने उल्लेख्य सुधार देखिएको छ । उक्त आम्दानी ५६.९१ प्रतिशतले बढेर १९ करोड ९४ लाख रुपैयाँ पुगेको छ । बैंकको कुल आम्दानीमा कमिसनबाट हुने योगदान बढ्दै जानुले गैरब्याज आम्दानीतर्फ पनि सुधार भएको संकेत गरेको छ ।