काठमाडौं । नेकपा एमालेका नेता ईश्वर पोखरेलले पार्टीभित्र देखिएको नेतृत्व विवाद र पछिल्लो राजनीतिक अवस्थाबारे धारणा सार्वजनिक गर्दै एकताका लागि आह्वान गरेका छन् ।
अध्यक्ष केपी शर्मा ओली पक्राउ परेपछि कार्यवाहक अध्यक्ष र संसदीय दलको नेताबारे अन्योल बढिरहेका बेला पोखरेलले फेसबुक मार्फत पार्टीलाई जोगाउन सबैलाई एकजुट हुन आग्रह गरेका हुन् ।
एमालेले कार्यवाहक अध्यक्ष र संसदीय दलको नेताका रूपमा रामबहादुर थापा लाई जिम्मेवारी दिएपछि पार्टीभित्र विवाद उत्कर्षमा पुगेको छ।
पोखरेलले एमाले स्थापनाकालदेखि नै प्रतिकूल परिस्थितिसँग जुध्दै आएको र सामूहिक नेतृत्व प्रणालीमा विश्वास गर्ने पार्टी भएको उल्लेख गरे। उनले पार्टीको सुदृढ संगठनात्मक संरचना, विधि–पद्धति, आत्मसमीक्षा र आलोचनात्मक चेत नै यसको मुख्य शक्ति रहेको बताए ।
उनले सिद्धान्तहीन सत्ता स्वार्थ र अवसरवादलाई पार्टीका लागि हानिकारक ठहर गर्दै वर्तमान चुनौतीपूर्ण अवस्थामा एकताबद्ध भएर अघि बढ्नुपर्नेमा जोड दिएका छन् ।
पोखरेलले विकसित राजनीतिक परिस्थितिअनुसार सोच र व्यवहारमा सुधार गर्नुपर्ने उल्लेख गर्दै “गति अनुसार मति” बनाउनुपर्ने आवश्यकता औँल्याएका छन्। साथै, विगतका अनुभवबाट सिक्दै पार्टीलाई थप सुदृढ बनाउनेतर्फ लाग्न सम्पूर्ण एमाले पंक्तिलाई आग्रह गरे ।
