भाद्रकृष्ण नवमी : भव्य श्रीकृष्ण रथ यात्रा

काठमाडौँ । श्रीकृष्णको जन्म भएको खुसियालीमा देशका विभिन्न भागमा रथयात्रा एवं शोभायात्रा निकालिएको छ ।

उत्तरी भेगस्थित बूढानीलकण्ठमा रहेको नेपाल अन्तरराष्ट्रिय श्रीकृष्ण भावनामृत सङ्घ (इस्कोन) को कार्यालय परिसरबाट  विशेष रथयात्रा निकालिएको थियो । यसै उपलक्ष्यमा काठमाडौँका विभिन्न धार्मिक सङ्घसंस्थाले  श्रीकृष्णको झाँकीसहित शोभायात्रा तथा रथयात्रा निकालेको छ ।

यसैगरी गोकर्णेश्वर–८ बेशीगाउँमा रहेको श्रीकृष्ण मन्दिर क्षेत्रबाट पनि आज रथयात्रा निकालिएको वडाध्यक्ष नन्दलाल श्रेष्ठले  जानकारी दिए । रथयात्रामा हजारौँ मानिसको सहभागिता थियो । कुरुक्षेत्रमा कौरवहरूसँगको लडाइँमा संलग्न पाण्डवमध्येका अर्जुनलाई उपदेश दिने क्रममा स्वयं श्रीकृष्णका मुखारविन्दबाट व्यक्त ‘श्रीमद्भागवतगीता’  पवित्र ग्रन्थ मानिन्छ । छोटकरीमा गीता नामले चिनिने यो ग्रन्थ विश्वमै सबैभन्दा बढी भाषामा अनुवाद भएको विश्वास गरिन्छ ।

भगवान् श्रीकृष्णले जन्म लिएको खुसियालीमा भाद्र कृष्ण नवमीका दिन देशभरका कृष्ण मन्दिरमा रथयात्रा एवं शोभायात्रा निकाल्ने गरिएको हो ।