आइतबार, कार्तिक २२ २०८३
आइतबार, कार्तिक २२ २०८३
बुधबार, साउन १४ २०८२
काठमाडौं । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले समाजवादी मोर्चा खारेजको प्रस्ताव गरेका छन् ।
मंगलबार नेकपा (एकीकृत समाजवादी)को कार्यालय आलोकनगरमा आफ्नै संयोजनमा बसेको बैठकमा विप्लवले मोर्चा खारेजीको प्रस्ताव गरेका हुन् ।
“चैत्र १५ गतेको कार्यक्रम निकै प्रभावकारी भयो । प्रतिगमन र यथास्थितिवादको विरुद्धमा भव्य कार्यक्रम भयो । त्यसपछि आ–आफ्नै व्यस्तताले मोर्चा गतिशील भएन । त्यसैले काम सकिएन भने किन राख्ने ? खारेज गरौँ भन्ने कुरा गर्नुभयो,” एक नेताले भने, “उहाँले नकारात्मकभन्दा पनि प्रभावकारी बनाऔँ भन्ने क्रममा भन्नुभएको हो ।”
नेपाल कम्युनिस्ट पार्टी (नेकपा)का प्रवक्ता खड्गबहादुर विश्वकर्माले मोर्चाका सबल पक्ष र दुर्बल पक्षको समीक्षा भएको भन्दै यसलाई प्रभावकारी बनाउन अझ सुदृढ गरेर अघि बढ्नुपर्ने निष्कर्ष निकालेको बताए ।
‘यस बीचमा भए गरेका काममा मोर्चा सफल रह्यो भन्ने निष्कर्ष छ । तर यसका केही समस्या छन्,’ विश्वकर्माले बैठकपछि भने, ‘जुन ढंगले गति लिनुपर्थ्यो । जनता र मोर्चामा सहभागी पार्टीका नेता र कार्यकर्ताका अपेक्षा, इमानदार नेता कार्यकर्ताको अपेक्षालाई सशक्त काममा केही सीमा रहे’, उनले भने, ‘जसकारण पछिल्ला दिनमा अलिकति प्रश्न उठेका छन् । अब निर्ममतापूर्वक सच्याउनेतिर लानुपर्नेमा हामी पुगेका छौं ।’
