व्यवसायी सुमार्गीको रकम नरोक्न सर्वोच्चद्वारा अन्तरिम आदेश

काठमाडौं माघ, २३–
सर्वोच्च अदालतले व्यवसायी  अजेयराज सुमार्गीले वैदेशिक लगानीका लागि ल्याउन लागेको करिब सवा २ अर्ब रुपैयाँ नरोक्न अन्तरिम आदेश जारी गरेको छ । आइतबार राष्ट्र बैंकले गरेको रोक्का फुकुवाको माग गर्दै सुमार्गीको नेपाल स्याटेलाइट टेलिकम  सर्वोच्च अदालत  गएको थियो ।
मंगलबार न्यायाधीश तेजबहादुर केसीको एकल इजलासले रकम विदेश लैजान नपाउने र सम्पत्ति शुद्धीकरण लगायतका मुद्दामा असर नपर्ने गरी निवेदकले चाहेको बेला रकम निकाल्न दिन अन्तरिम आदेश दिएको हो  ।
सर्वोच्चले मंगलबार भएको बहसपछि विषयको गाम्भीर्यताका हिसाबले आगामी फागुन २ गते वृहत्तर छलफल गर्ने भन्दै दुबै पक्षलाई  बोलाएको छ । सर्वोच्चको आदेश पछि अधिवक्ता रामनारायण विडारीले सर्वोच्चले उद्योगमा लगाउन विदेशबाट ल्याएको ऋण नरोक्न आदेश जारी गरेको प्रतिक्रिया दिए । साथै,  रकम रोक्का गर्ने कानुनी आधार र कारण नभएको तथा उद्योगलाई क्षति पुगेको सर्वोच्चको ठहर छ ।
 युवराज खतिवडा गभर्नर हुँदा  राष्ट्र बैकले  सुमार्गी र उनी संलग्न कम्पनीको नाममा आएको ३ अर्ब बढी रकमको स्रोत खुल्न नसकेको भन्दै रोक्का गरेको थियो ।