बिहिबार, साउन १४ २०८३
बिहिबार, साउन १४ २०८३
काठमाडौं माघ, १५–
राष्ट्रियसभामा उम्मेदवारी दिएका एमाले नेता बेदुराम भुसालले आफ्नो उम्मेदवारी फिर्ता लिएका छन् । प्रदेश ३ को खुला कोटाबाट एमालेको तर्फबाट राष्ट्रियसभा सदस्यको उम्मेदवार बनेका नेता भुसालले माओवादी नेता रामबहादुर थापाको जित सुनिश्चत गर्न भन्दै उम्मेदवारी फिर्ता लिएका हुन् । प्रदेश ३ बाट खुला सदस्यमा एमालेबाट बलराम बास्कोटा र बेदुराम भुसाल उम्मेदवार छन् भने माओवादीबाट रामबहादुर थापा वादल उम्मेदवार बनेका थिए ।
प्राथमिकता क्रममा एक नम्बरमा बास्कोटा, २ नम्बरमा बादल र तेस्रो नम्बरमा भुसाल थिए । तर, नेमकिपा लगायतका साना दलले समर्थन नगरेपछि तीनमध्ये २ सिट मात्र वाम गठबन्धनले जित्न सक्ने देखिएको छ ।
त्यस्तो अवस्थामा एमालेको भोट वादललाई नआउने र उनले चुनाव हार्न सक्ने भन्दै माओवादी झस्किएपछि एमाले र माओवादी शीर्ष नेताहरुको बैठक सोमबार बसेको थियो, जहाँ भुसालको उम्मेदवारी फिर्ता लिने सहमति भएको छ ।
त्यही सहमति अनुसार भुसालले उम्मेदवारी फिर्ता लिए । ‘बादलजीलाई अप्ठ्यारो पर्ने र त्यसले पार्टी एकतामै असर गर्न सक्ने कुरा आयो’ भुसालले भने, ‘पार्टी एकतामा नै अप्ठ्यारो पर्छ भने म त्याग गर्न तयार छु भनेर फिर्ता लिएँ ।’
