बिहिबार, साउन १४ २०८३
बिहिबार, साउन १४ २०८३
काठमाडौं मंसिर, २५–
मत परिणाममा अग्रता लिँदालिँदै नवराज सिलवाललाई फोनमै या मतगणना स्थलमै यो घरमै पनि मास्क लागएरै भए पनि कतिपय प्रहरीका अफिसरहरु बधाई दिन पुगेका थिए । डिआइजीबाट राजीनामा दिएपछि सिलवालको खोइरो खन्नेहरुको लर्कोले सबै आश्चर्यचकित बनेका छन् । हिजोसम्म सिलवाललाई हिरासतमा पुर्याउँदा थपडी बजाउनेहरु अहिले नवराज सिलवाल सांसद बनेपछि बधाई दिन पुगेका छन् । बधाई दिने यिनीहरु खासमा चाप्लुसी गर्न पुगेका हुन् भनेर व्याख्या पनि भइरहेको छ ।
नेपाली कांग्रेसको सरकार आउला र प्रकाश अर्याललाई बीचमै ‘कू’ गरेर आइजिपी बन्ने सपना सजाएर बसेका जयबहादुर चन्दको सपनामा पानी खनिएकोछ । त्यो भन्दा ठूलो चोट त प्रकाश अर्याललाई नै लागेको छ । कीर्ते कागजातको अभियोगमा हिरासतमा पुर्याउने तिनै थिए – प्रकाश अर्याल । अर्याल अहिले आइजिपी छन् । यिनी आइजिपीभन्दा पनि प्रधानमन्त्री शेरबहादुर देउवाका सबैभन्दा बफादार प्रहरी पनि हुन् । अर्यालले आफ्नो कार्यकाल सुरु भएपछि गरेको सबैभन्दा ठूलो काम भनेको नेताको सेवा नै हो । जताततै बम विष्फोट हुँदा, मानिसहरु अंगभंग हुँदा पनि नेत्रविक्रम चन्दलाई समाएर सात दिन थुन्न नसकेको असक्षमताको दाग यिनको निधारमा लागिरहेको छ । आफ्नै सहकर्मी, सहधर्मी मित्र नवराज सिलवाललाई नेताले आदेश दिएको भरमा लगेर थुन्ने अर्यालले अब उनैलाई सलाम गर्नुपर्ने दिन आयो । ललितपुर क्षेत्र नम्बर १ बाट नेकपा एमालेका नवराज सिलवाल विजयी भएका छन् । उनले कांग्रेसका उम्मेदवार तथा पूर्व सांसद उदयशमसेर राणालाई ६ हजार २ सय १७ मतान्तरले पराजित गरे । सिलवालले ३६ हजार ९४६ मत प्राप्त गर्दै जित हात पार्दा राणाले २० हजार ७२९ मत पाए । प्रतिनिधि सभा सदस्यमा विजयी सिलवाल अब माननीय भए ।
माननीयलाई मुख्यसचिवले त कुर्सीबाट उठेर नमस्कार टक्रयाउनु पर्छ भने प्रकाश अर्यालले त किन नपरोस् । पुस महिनाभित्र नयाँ सरकार बनिसक्नेछ । नयाँ सरकार बनेलगत्तै कुनै पनि बेला सिलवाल प्रकाश अर्यालको कार्यकक्षमा प्रवेश गर्न सक्छन् । त्यो बेलाको दृश्य कल्पना गर्ने हो भने पनि अर्यालको अवस्था के होला अनुमान लगाउन सकिन्छ । समय र परिस्थिति सधै आफूअनुकूल हुन्छ भन्ने सोच्नु नै प्रकाश अर्यालका लागि ठूलो भूल भयो । आफैले दपेटेको व्यक्तिलाई अहिले आफैले सलाम हान्नु पर्ने अर्यालले एकमनले पनि सोचेका थिएनन् होला । आजको अमृतबजार साप्ताहिकमा खबर छ ।
