सत्यमोहन जोशीको स्वास्थ्यमा सुधार नभएपछि आइसियुमा राखेर उपचार

काठमाडौं । वाङ्मय शताब्दी पुरुष सत्यमोहन जोशीको स्वास्थ्यमा सुधार नभएपछि आइसियुमा राखेर उपचार सुरु गरिएको छ ।

मुटुको चालसम्बन्धी समस्या देखा परेकाले उनलाई आइसियुमा राखेर उपचार सुरु गरिएको किष्ट अस्पतालले जनाएको छ । 

अस्पतालले सोमबार साँझ जारी गरेको विज्ञप्तिमा जोशीको अवस्था चिन्ताजनक रहेको जानकारी दिएको हो ।

अस्पतालका निर्देशक प्राडा सुरज बज्राचार्यले जारी गरेको विज्ञप्तिमा जोशीको समग्र स्वास्थ्यमा उल्लेखनीय सुधार नभएको र अवस्था चिन्ताजनक रहेको उल्लेख गरिएको छ ।

आइतबारबाट मुटुको चाल बढेपछि उनलाई उच्च मात्रामा अक्सिजन दिइएको थियो । स्वास्थ्यमा समस्या देखिएपछि १९ दिनअघि उनलाई अस्पताल भर्ना गरिएको थियो । रगत परीक्षणपछि उनमा डेंगु पुष्टि भई उपचार भइरहेकोमा आइतबार बढी समस्या आएर उच्च मात्रामा अक्सिजन दिइएको हो । उनको छातीमा निमोनिया संक्रमणसमेत देखिएको अस्पतालले जनाएको छ ।

जोशीको स्वास्थ्य अवस्थाका बारेमा जानकारी दिन दैनिक रूपमा बुलेटिन निकाल्न थालिएको अस्पतालले जनाएको छ ।

१०३ वर्षीय संस्कृतिविद् जोशीले नेपालको सांस्कृतिक क्षेत्रमा महत्वपूर्ण योगदान पुर्‍याएका छन् ।