एनसेलको ‘एकमा दुई’ अफर प्रतिमिनेट २५ पैसामा कल गर्न सकिने

काठमाडौं, 
एनसेलले आफ्ना ग्राहकका लागि भ्वाइस प्याकमा ‘एकमा दुई’ अफर सार्वजनिक गरेको छ । यस योजनाअन्तर्गत एनसेलका प्रिपेड ग्राहकले अब करसहित २५ पैसा प्रतिमिनेट सम्ममा एनसेलको अन्य नम्बरमा कल गर्नसक्ने कम्पनीले जनाएको छ । 

योजनाअन्तर्गत हालकै मूल्यमा दैनिक, साप्ताहिक वा मासिक भ्वाइस प्याक खरिद गर्दा दोब्बर मिनेट प्राप्त गर्नेछन् । यसको मतलब, ११ मा ११ मिनेट टकटाइम(कुरा गर्ने समय) भएको  दैनिक ‘भ्वाइस प्याक’को खरिदमा अब ग्राहकले २२ मिनेट ‘टकटाइम’ प्राप्त गर्नेछन्, जुन २४ घण्टाको लागि मान्य हुनेछ ।  साप्ताहिक भ्वाइस प्याकमा ग्राहकले ६० मा सात दिनको समयसीमा भएको १४० मिनेट ‘टकटाइम’ पाउनेछन् । हाल यो प्याकमा ग्राहकले ७० मिनेट पाउने गरेका छन् । त्यसैगरी, मासिक भ्वाइस प्याकमा अब ग्राहकले २०० रुपैयाँमा ४०० मिनेट नभई ८०० मिनेट प्राप्त गर्नेछन् । यसरी ग्राहकले अब मासिक ‘भ्वाइस प्याक’ खरिद गर्दा २५ पैसा प्रतिमिनेटसम्ममा कल गर्नसक्नेछन् । भ्वाइस प्याकका मूल्यहरु करसहितका हुन् । ग्राहकले आफ्नो ‘भ्वाइस’ सेवाको आवश्यकताअनुसार युएसएसडी, आईभीआर, एसएमएसलगायतका माध्यमबाट भ्वाइस प्याक सुचारु गरी ‘एकमा दुई’ अफरको लाभ लिन सक्नेछन् । ग्राहकले १७११८ डायल गरेर दैनिक भ्वाइस प्याकका लागि १, साप्ताहिक भ्वाइस प्याकका लागि २ र मासिक भ्वाइस प्याकका लागि ५ थिचेर यो सेवा सुचारु गर्नसक्नेछन् । युएसएसडीबाट सेवा सुचारु गर्न ग्राहकहरुले एस्ट्रिक १७११८ ह्यास डायल गरी आफूलाई चाहिएको विकल्प छनोट गरी सेवा सुचारु गर्न सक्नेछन् । 
त्यसैगरी, एसएमएसमार्फत भ्वाइस प्याक खरिद गर्न ग्राहकहरुले दैनिक भ्वाइस प्याकका लागि ११, साप्ताहिक भ्वाइस प्याकका लागि ६० र मासिक भ्वाइस प्याकका लागि २०० टाइप गरी १७११८ मा एसएमएस पठाई सेवा सुचारु गर्नसक्नेछन् । ‘‘सेवाको शुल्क अझै घटाउँदै ग्राहकहरुका लागि थप मूल्य प्रदान गर्न यो अफर ल्याउन पाउँदा हामी निकै हर्षित छौँ । सुलभदरमा उत्कृष्ट सेवा प्रदान गर्ने हाम्रो प्रतिबद्धताअनुरुप यो अफर ल्याइएको छ’, एनसेलका कर्पोरेट संवादविज्ञ मिलन शर्माले भने । ‘एकमा दुई’ अफर तीन महिनाको लागि मान्य हुनेछ । भ्वाइस प्याकको समयावधि सकिएपछि वा टकटाइम सकिएपछि ग्राहकहरुलाई एनसेलबाट एनसेलमा कल गर्दा विद्यमान शुल्क  २.५०  रुपैयाँ (करसहित) प्रतिमिनेट लाग्ने कम्पनीले जानकारी दिएको छ ।